3 inmates gi-ambush patay

CEBU, Philippines – Tulo ka binilanggo sa Talisay City Jail ang gi-ambush patay diha sa Barangay Linao dili layo gikan sa maong prisohan samtang sila gidala padung sa korte alang sa arraignment sa ilang mga kaso kagahapon sa buntag.

Ang mga namatay mao sila si Yayam Gaviola, 40; Marwin Abelgas, 27, ug si Rabadon Jovencio, 36. Si Gaviola ug si Abelgas may kaso sa ginadiling drugas samtang si Jovencio, frustrated murder.

Matud pa ni PO2 John Xyrus Ilustrisimo, imbestigador sa Talisay City Police gikuyogan sila nilang JO2 Eran Marquita ug JO3 Clay Gutierrez sakay sa ilang van.

Apan 300 metros pa lang gikan sa paggawas nila sa Talisay City Jail adunay duha ka lalaking nagmotor nga nangatumba sa ilang agianan hinungdan nga mihunong ang van.

Apan kalit  nga ang usa sa mga lalaki nibunot og armas ug nipusil sa van ug maayo na lang  nakahupo ang drayber ug wala maigo. Apan diha sa ilang luyo naabot ang unom ka motorsiklo nga pulos armado ang sakay.

Nisuway sa pagbunot sa armas ang backup escort diha sa luyo apan giunhan siya sa pagpusil ug naigo sa iyang dughan. Wala makalapos ang bala tungod kay nagsuot kini og bulletproof vest. Apan silang duha gipakanaog sa van ug gipangdisarmahan ug wala pasipad-i sa mga armado.

“Giingnan ang mga escort nga dili na lang mopalag kay ang tuyo nila ang mga piniriso ra kay dako og utang kanila,” nagkanayon si Ilustrisimo gikan sa pamahayag sa jailguards.

Dihadiha giduol sa mga armado ang mga inmates sa van ug didto gitagsa-tagsa pagpusil. Gidala sa Talisay City District Hospital ang mga biktima apan pulos gideklarar nga dead on arrival.

Si Chief Insp. Mary Jane Inopia, warden sa TCJ miingon nga notado gyud ang nangamatay nga maoy pirmeng makuhaan og mga kontrabando matag adunay greyhound operation.

Ang direktor sa Bureau of Jail Management and Penology (BJMP)-7 nga si Arnold Buenacosa misusi sa TCJ ug mirekomendar nga dugangan ang mga jailguards didto ug kinahanglang mo-request gyud og dugang backup kon dunay ihatud nga priso sa korte.

Nagtuo sila ni Ilustrisimo nga may kalabotan sa ginadiling drugas ang motibo sa pagpatay sa tulo.

Tungod sa nahitabo, gibutang sa heightened alert ang tanang prisohan ubos sa BJMP. Padayon pa usab ang gihimong imbestigasyon sa maong hitabo. (Rowena Capistrano/IBM)(BANAT NEWS)