Merkado sa Mandaue buksan Agosto 30

CEBU, Philippines — Hingpit nga buksan ang bag-ong merkado publiko sa Dakbayan sa Mandaue atol sa Charter Day karong Agosto 30.

Kini ang gibutyag ni Mayor Gabriel Luis “Luigi” Quisumbing nunot sa gikatakdang paghuman niini karong buwana ug hinayhinay sab nga mamalhin ang mga manindahay.

Mokabat sa P65 milyones ang gahin sa kagamhanan sa dakbayan alang sa paghuman sa maong merkado. Dugang ni Quisumbing nga sa dili pa ang pag-abli niini, mahimong makita sa mga tindera ang ilang estado sa Market Administrator’s Office sa pagsuta kun nahingpit na ang ilang pagbaton og pwesto.

Sa niaging buwan gihimo ni Atty. Ernesto Maringuran sa mga market vendors ang pagsusi sa ilang estado kung malakip ba sila sa makapadayon sa ilang pagpamaligya sa bag-ong merkado.

Ang bag-ong merkado anaa mahimutang sa karaan nga lugar luyo sa National Shrine of St. Joseph diin adunay 1,200 ka stalls.

Sa laing bahin duha ka bag-ong fire stations sa Bureau of Fire Protection sa Probinsiya sa Sugbo ang gibuksan nga gipangulohan ni BFP-7 Director Samuel Tadeo uban sa mga opisyal sa kalungsuran. Ang gibuksan naglangkub sa Santa Fe Fire Stations ug karong adlawa mao ang Asturias Fire Station.

Matud ni Tadeo nga ang budget sa katukuran sa maong fire stations gikan sa panudlanan sa BFP samtang ang luna iya sa lokal nga pangagamhanan.

Sumala pa ni Tadeo nga gumikan sa maong bag-ong fire stations, mas mapadali nila ilang serbisyo ilabi na sa katawhan nga molukat og mga permits.

Mas mapadali sab ang ilang pagtubag kung adunay motumaw nga sunog o bisan unsa nga emerhensya ug dili na magpaabot sa ilang silingan nga fire stations.

Gitug-an ni Tadeo nga ang Santa Fe cluster sa Bantayan Fire Stations samtang ang Asturias sa Balamban Fire Stations.

Gipahibawo ni Tadeo nga gawas sa Sugbo aduna sab silay duha ka fire stations nga buksan sa Probinsiya sa Bohol. (Rowena D. Capistrano/GMR)(BANATNEWS)