Vote buying sa ABC gibutyag
CEBU, Philippines — Duha ka semana sa di pa mahitabo ang Association of Barangay Council (ABC) Elections sa siyudad sa Sugbo, si Cebu City Mayor Tomas Osmeña mipasangil nga nakadawat sila og report nga adunay nahitabong vote buying sa mga kapitan.
Ang mayor mipasangil sa oposisyon nga namalit og botos sa mga kapitan ug nagkataas ang presyo sa pinalitay.
Siya miingon nga sa mga mosunod nga adlaw aduna sila’y i-presentar nga pagpamatuod nga adunay nahitabong vote buying ug posibleng mopasaka sila og kaso.
“The important thing is that we don’t like to be reactive we just like to tell the people what’s going on imagine to be a City Council you give one million per Barangay Captain, there’s another agenda here you know,” matud ni Osmeña.
Matud pa ni Osmeña daghan sa mga kapitan nga iyang kaalyado ang gipangtanyagan. Siya miingon nga usa si Mabolo Barangay Captain Niña Mabatid ang matud pa naghatag og pundo sa vote buying.
“Just give me a few days and I will try collate all of this information this is very unusual. It’s all pointing out to Mabatid not Franklin Ong,” dugang sa mayor nga nagdepensa sa iyang pambato nga si Ong.
Apan si Mabatid kusganong mihimakak niini ug gusto lang gyud dauton iyahang ngalan. Si Mabatid wala pa makadesisyon kon makig-atbang ba kini sa pambato sa mayor. Kini midugang sa Hulyo 23 pa mahibaw-an kon siya magpapili ba o dili.
“Karon nagsigi mi og meeting karon kay hapit naman ang filing tan-awon namo unsa gyuy real situation ba. I-assess namo then mo-decide mi,” asoy ni Mabatid.
“Yes, nakadungog ko nga gipang-offeran-offeran lang ang mga kapitan.
Kinsa? Mas maayo sila ang pangutan-on. Kung naa’y ihatag sa pikas makopras gyud na, tinuod lagi… Ngano mo-offer man ko nga majority man mi sa numbers? Sa numbers, 50 mi. Sa among duha kinsa man ang most likely mo-offer, kami nga majority or ang minority?” matud pa ni Ong kinsa wa mohingalan kinsa iyang gipasabot nga laing kandidato. Masaligon siya nga sila sa BOPK lig-on ug kahibalo ang mga kapitan sa kwalipikasyon sa angay’ng mamahimong ABC president. (/IBM)(BANATNEWS)
- Latest
