Kagawad, laing lima sikop sa drug raid
CEBU, Philippines — Giapil karon sa listahan sa mga narco-politicians ang incumbent barangay kagawad sa barangay Casili, Consolacion ug anak sa kanhi mayor sa maong lungsod nga si Avelino Gungob Jr. human kini nadakpan sa usa ka anti-illegal drugs operation kauban sa iyang bayaw diha sa dalan M. Velez, Barangay Guadalupe, Cebu City niadtong Miyerkules sa kaadlawon.
Ang tigpamaba sa Cebu City Police Office nga si Police Senior Insp. Arieza Otida miingon nga bayaw ni Gungob ang subject sa search warrant nga si Clint Francis Fernandez alyas Opaw.
“The mere fact he was arrested, its already a sufficient basis to be included sa list kay naa man tay presumption sa polis,” matud sa hepe sa Consolacion Police Station nga si Police Chief Inspector Gerard Ace Pelare.
Giangkon ni Pelare nga nakugang siya kay wala sa ilang listahan ang kagawad. Didto sa balay ni Fernandez ang kagawad ug giingong nisuyop kini kauban silang Garry Pepito, 39, ug si Noel Goser, 35.
Apan si Gungob mihimakak sa pasangil kay matud niya natulog ra siya didto kay duna silay negosyo sa Carbon Public Market.
Si Fernandez ug ang kapuyo nga si Aillen Bornales, 25, giingong naabtang nag-repack og mga shabu.
Gihulagway sa pangulo sa Cebu Provincial Anti-drug Abuse Office (CPADAO) insulto sa mga konstituwente sa barangay kon ang lider nalambigit sa ilegal nga drugas. (Le Phyllis F. Antojado/IBM)(BANATNEWS)
- Latest