‘Passport on Wheels’ gidumog sa mga tawo

CEBU, Philippines —  Gidumog sa gatusan ka Sugboanon ang Mobile Passport Services sa Department of Foreign Affairs nga gitawag og Passport on Wheels nga gipaagi sa buhatan ni Konsehal Raymond Alvin Garcia sa Dakbayan sa Sugbo.

Ang konsehal nakadawat og mga reklamo gikan sa mga Sugbuanon labot sa pagkuha og passport hinungdan nga gitawagan niini si Bise Mayor Edgardo Labella ug sila nihangyo sa Office of the Presidential Assistant for the Visayas pinaagi ni Secretary Michael Dino nga mokontak sa DFA.

“It’s good nga ni-action dayon sila, so it will be on August 1 and 2, pero kay limited slots lang first 1,000 lang gyud ang ihatag for Cebu City residents because ang uban like Mandaue they also have slots, ang Carcar, ang Lapu-Lapu, they also have slots,” matud ni Garcia.

Kadtong mga nagpuyo gawas sa Siyudad sa Sugbo, si Garcia niasoy nga angayan silang makig-alayon sa ilang lokal nga kagamhanan labot niini. Gihimug-atan ni Garcia nga wala’y dawaton nga walk-ins tungod kay kinahanglan unang isumetir ang application packets ug ang tanang mga requirements sa iyang buhatan o kaha sa buhatan ni Labella.

“We will screen it and kami nay moingon didto nga naa moy appointment, so do not go directly there because you will not be entertained,” sigun sa konsehal.

Kagahapon unta ang deadline sa pag-submit sa mga gikinahanglan nga mga rekisitos apan kay nakita man sa konsehal nga daghan gyud ang nidagsa maong gilugwayan kini hangtud Biyernes, Hulyo 20, sa alas 12 sa udto. (Richel Ann P. Basiga, USJ-R Intern/GMR)  (BANATNEWS)