Karaang tindahan nasakpang way resibohay

CEBU, Philippines —  Usa sa labing karaan ug inila nga tindahan sa may dalan Plaridel, Dakbayan sa Sugbo lakip ang mga bodega niini ug mga restaurants niini ang gioperasyonan sa taga Bureau of Internal Revenue-7.

Kini human giingong walay opisyal nga resibo nga ihatag ug walay rehistro ang warehouse niini.

Pinangulohan ni BIR Regional Director Eduardo Pagulayan Jr., gisubay kagahapon ang Ongking King human gipahigayon ang duha ka semana nga pagpaniid diin nasuta ang mga kalapasan niini.

Matud ni Pagulayan nga nakadawat sila og sumbong nga ang maong tindahan dili mohatag og opisyal nga resibo, ang cash register machine ug ang point of sale machine expire ug wala na narehistro ang ilang warehouse sa buhatan sa BIR.

Sumala pa ni Pagulayan nga atol sa ilang operasyon wala hinoon nipakita og pagsupak ang nagdumala sa maong tindahan tungod kay admitado man kini nga adunay mga lapso nga nahimo.

Dugang pa ni Pagulayan nga ila karon giselyuhan ang POS ug CRM sa maong tindahan diin dili kini mahimong magamit hangtud dili makabayad ug ma-evaluate sa buhatan sa BIR lakip usab ang mga warehouses kung dili makaduso sa ilang mga gipangayo nga mga dokumento sama sa inventory books nga nagpakita sa pagsulod ug gawas sa ilang mga produkto.

Gitug-an ni Pagulayan nga ila karon gipatuman ang unsay nalatid sa balaud aron sa paghatag og patas nga patigayon ilabi na sa mga negosyante nga diniyos nga nibayad sa ilang mga buhis.

Susihon karon sa BIR kung unsa ka gidugayon ang maong balay patigayon nga nakalapas sa lagda lakip ang mahimo niining bayronon.

Ang rehiyonal nga direktor sa BIR nitug-an nga aduna pa silay mga balay patigayon karon nga gitutukan nga malapason sa balaud ug iyang gipaneguro nga iya gyud ipatuman kung unsay tukma ug sakto ilabi na sa pamunoan ni Presidente Rodrigo Duterte nga nagpatuman sa mga sakto.

Si Pagulayan pipila pa lang ka buwan nilingkod isip rehiyonal nga direktor sa BIR sa Sugbo. GMR (BANATNEWS)