Osmeña gilabtikan sa kapitan

CEBU, Philippines — Walay niatbang sa tinuboy ni Toledo City Mayor John Henry  Osmeña sa pagka-presidente sa Association of Barangay Councils atol sa eleksiyon kagahapon.

Si Cabitoonan Barangay Kapitan Ophelio Dolino ang napili human si Magdugo Barangay Kapitan Walter Lao nisibog sa iyang kandidatura human sila gihatagan og higayon nga makapaila-ila ug makapadayag sa tagsatagsa nila ka plataporma.

Sa 38 ka barangay kapitan, usa lang ang wala nakatungha diin 30 kanila giingong alyado ni Osmeña.

Atol sa iyang pagpakigpulong, si Lao nihagit kang Dolino nga dili magpagawong kang Osmeña.

Si Lao gikatakda nga magpapili sa pagka-mayor sunod eleksiyon batok ni Osmeña.

“Uyon ko sa plataporma ni Dolino nga kaayuhan sa lungsod, di lang unta gawngan sa mayor,” matud niya.

Gibanatan ni Lao si Osmeña sa pagkanselar niini sa pundo sa mga proyekto nga gigahin na niadtong 2015 hangtud 2017 nga alang unta sa kabarangayan balor og P56.6 milyones duha ka adlaw sa wala pa molingkod ang bag-ong mga opisyal sa barangay niadtong Hulyo 1.

Labing daku niini nga P23.4 milyones alang sa Sapangdaku repair, rehabilitation ug rechanneling ug gisundan sa P10 milyones alang sa barangay waterworks program.

Si Lao nangapod-apod ngadto sa mga kapitan sa kopya sa City Development Council (CDC) Executive Committee Resolution No. 2018-002 pinetsahan og Hunyo 29, 2018 nga nagkanselar sa ubang proyekto ug nag-aprobar sa bag-ong proyekto nga ipaapas sa Annual Investment Program karong tuiga nga balor og P428.7   milyones.

Kini naglakip sa P157 milyones nga water projects, P150 milyones nga pagpamalit og engineering equipment; P30 milyones nga senior citizens welfare fund; P26 milyones nga drainage system construction, ug uban pa.Gikwestiyon ni Lao kung nganong ang CDC Execom lang ang niaprobar sa maong mga proyekto ug wala gani hatagi og higayon ang mga kapitan nga makasalmot sa pagtuki niini.

Ang CDC Execom gilangkuban nilang Konsehal Marjorie Perales, outgoing ABC president Dario Surig ug Virgilio Fortich kinsa representante sa non-government organization. - Nova Jane A. Yanson (BANAT NEWS)