Pag-oktaba sa 2019 elections apiki
CEBU, Philippines — Apiki na ang panahon alang sa Commission on Elections nga isibog ang 2019 mid-term elections subay sa sugyot ni Speaker Pantaleon Alvarez.
Matud ni Atty. Ferdinand Gujilde, provincial election officer, nga ang pagsang-at sa certificate of candidacy karon nang Oktubre.
Si Gujilde nagkanayon nga dili usab basta nga mauswag ang eleksiyon gawas kung may force major o katalagman, terorismo, violence ug destruction sa election paraphernalia.
Subay niini matud ni Gujilde nga ang gihatagan ra sa balaud og awtoridad sa pag-oktaba sa eleksiyon ang Comelec en banc ug kinahanglan sab usbon ang Constitution.
"Ang pag-postpone sa election 2019 can only be done within the context of the new Constitution, within the 1987 Constitution, for as long as the 1987 Constitution is written as it is now, wala siya gi-amendahan, wala siya gi-revise, dayon gyud ang election,” matud ni Gujilde.
Si Gujilde nidugang nga dili sab basta nga makapasar og balaud ang Balay-Balauranan sa pagsibog sa piniliay.
"Congress cannot legislate, dili pwede mopasar og balaud nga atong i-postpone kay in effect amend the Constitution, unya ang pag-amend sa Constitution cannot be done by mere legislation," matud ni Gujilde.
Dugang ni Gujilde nga ang pag-usab sa Constitution adunay tulo ka pamaagi nga mao ang Constitutional Assembly, Constitutional Convention ug People's Initiative. (BANAT NEWS)
- Latest
