Asa napunta ang mga handbooks?

CEBU, Philippines — Ang listahan sa mga nakadawat sa handbook nga gipalit sa Probinsya sa Sugbo pinaagi sa Provincial Disaster Risk Reduction and Management Office  (PDRRMO) giingong walay pangalan ug pirma sa pangulo o authorized personnel nga midawat sa maong handbook, sumala sa Commission on Audit (COA).

Ang PDRRMO nipalit og 17, 600 ka Disaster Preparedness Handbook nga gitawag nga “Pagpangandam sa Katalagman” nga nagkantidad tanan og P4.4 milyones ug giapud-apod ngadto sa mga eskuylahan.

Apan nadiskubrehan sa COA sa distribution list isip supporting document sa disbursement voucher walay pirma sa pangulo o otorisadong personnel nga midawat sa maong mga handbook.

“Verification of documents supporting the payment for the procured 17, 600 pieces of Disaster Preparedness Handbook worth P4.4 million showed that the distribution list did not bear the names and signatures of the head or authorized representatives of the 824 recipient schools to confirm receipt of the items,” sumala sa COA.

Dugang sa COA nga bisan unsa nga butang nga madawat sa gobiyerno kinahanglan may nidawat niini pinaagi sa pangalan ug pirma aron nga masiguro nga nadawat ang maong item.

Rekomendasyon sa COA ngadto sa PDRRMO nga isumiter ang listahan uban na sa mga pirma sa mga beneficiaries nga eskuylahan o ang authorized personnel niini aron paglikay sa disallowance  audit.

Gisaad usab sa pangulo sa PDRRMO nga si Baltzar Tribunalo Jr. nga ilaha kining sundon ug makigkita sila sa Provincial School Board bahin niini. (BANAT NEWS)