Osmeña gitugutan makadispatsar sa luna alang sa 93-1

CEBU, Philippines — Mahuwasan na unya ang mga beneficiaries sa 93-1 land swap deal sanglit ang disposition sa properties nagkaduol na. Niadtong Hulyo 10, ang konseho sa Siyudad sa Sugbo niaprobar sa resolusyon nga nagtugot kang Mayor Tomas Osmeña nga mopirma sa deed of donation and acceptance tali sa Probinsiya sa Sugbo nga legal nga mabalhin ang mga nalambigit nga properties.

Kini nahimong posible human ang ubang sakop sa konseho niuyon sa resolution nga giduso ni Konsehal Eugenio Gabuya Jr.

Apan sa wala pa kini nahitabo, duna unay 10-minutos nga diskusyon human ang ubang mga konsehal dunay mga iya-iyang mga pangutana.

Si Konsehal Jose Daluz III nga usa ka abogado nangutana sa committee on laws, ordinances and styling kon ang deed of donation nasubay ba sa Memorandum of Agreement. Tuig na ang nakalabay nga si Osmeña ug Gobernador Hilario Davide III nipirma sa maong MOA.

Ang chairman sa committee, Konsehal Sisinio Andales, nisulti kang Daluz nga ang legislative measure nasubay sa balaud dungan sa pagbutyag nga ang City Legal Office wala'y gipadayag nga pagsupak.

Gawas kang Daluz, si Konsehal Raymond Garcia nga abogado sab, nangutana kang Gabuya sa proceedings sa pag-dispose sa properties ilabi na si Garcia ni-sponsor og ordinansa alang sa 2.5-hectare lot sa South Road Properties.

Ang 2.5-hectare pipila lang sa properties sa siyudad nga i-transfer sa probinsiya ug aron legal kini nga i-dispose ang siyudad kinahanglan mo-draft og ordinansa.

“We are going to authorize the mayor with everything else except this 2.5 hectare of land in SRP or are we going to wait for this ordinance and then we lump everything then authorize the mayor including this 2.5 property?” matud ni Garcia.

Sigun ni Gabuya nga na-aprubahan na nila ang resolusyon ug ang proposed ordinance mosunod na.

Kini niingon nga ang kagamhanan sa siyudad maghuwat sa Provincial Board aron aprubahan ang resolusyon nga maghatag og pagtugot kang Davide nga mohimo sab sa ingon.

Sa pagkutlo niining balita, ang proposed ordinance ni Gabuya mag-transfer sa ownership sa 2.5 hectare lot sa SRP gipaubos sa pagtuon sa committee on laws, ordinances and styling ingon man sa City Legal Office. Si Emily Manto, presidente sa 93-1 Movement, mapasalamaton sa suporta nga gihatag sa konseho ngadto kanila.

“Mapasalamaton kaayo ko og dako sa tanang members sa City Council sa ilang suporta gyud namo sa 93-1 sukad pa kaniadto na wala sila maglubad sa pagsuporta kanamo. Og labaw sa tanan sa kang Mayor Osmeña kay siya gyud nag-push niani nga ma-push gyud namo," matud pa niya.

Ang pagsulbad sa isyu sa 93-1 lakip sa gisaad nila ni Osmeña ug Davide sa ilang pag-asumir sa katungdanan human sa 2016 elections. Gikan sa 11 ka barangay ang mga beneficiaries sa 93-1 sama sa Kamputhaw, Capitol Site, Kalunasan, Busay, Bo. Luz, Lahug, Mabolo, Apas, Lorega, San Miguel, Kasambagan ug Tejero. (BANAT NEWS)