GICA wa kakuha og TRO sa kaso

CEBU, Philippines — Giduso na alang sa desisyon sa Court of Appeals ang kaso sa pagtangtang sa serbisyo kang Dumanjug Mayor Efren Guntrano Gica.

Kini base sa resolusyon sa CA Eighteenth Division nga gilangkuban nilang Associate Justices Marilyn Lagura-Yap, Gabriel Ingles ug Gabriel Robeniol.

Unang gibasura sa CA ang petisyon ni Gica nga nangayo og temporary restraining order labot sa desisyon sa Ombudsman nga nagtangtang kaniya sa katungdanan.

Matud ni Gica nga ilegal ang pagtangtang kaniya sa serbisyo nunot sa kasong gipasaka sa iyang karibal sa politika nga si kanhi mayor Nelson Garcia.

Mismo ang kadagkuan sa Ombudsman ug Department of the Interior and Local Government ang nibabag nga makakuha og TRO si Gica.

Si Gica niduso og mga mosyon sama sa pagpabakwi sa nahaunang resolusyon sa CA, pagpabakwi sa DILG Memorandum nagmando kang Bise Mayor Rainerio Asentista sa paglingkod na isip mayor ug ni Konsehal Cesar Baricuatro isip bise mayor.

Nihangyo si Gica sa CA nga ibalik siya isip mayor ug hukman ang kaso base sa merito niini.

“Wherefore, the Court resolves to  consider the petition submitted for decision,” nagkanayon ang CA Resolution nga pinetsahan og Abril 25, 2018.

Si Garcia nipasangil kang Gica nga niusab sa resibo sa usa ka kan-anan sa ilang pagpangaon kuyog sa mga opisyal sa barangay nga nitambong sa seminar sa Association of Local Budget Officers (ALBO) niadtong 2014.

Giingong nigasto og P21,435 si Gica gamit ang pundo sa lungsod sa ilang pagpangaon sa Ding Qua Qua Dimsum.

Nakit-an nga ang orihinal nga resibo nagkantidad lang og P11,435 ug giingong 100 ka tawo ang nangaon apan ang tinuod 39 ra.

Gihimakak ni Gica ang pasangil apan namatud-an gihapon siya sa Ombudsman nga nakahimo og kalapasan. (BANAT NEWS)