Amahan nga mangunguling gipatay sa anak
CEBU, Philippines — Giunay pagpatay sa iyang anak ang 63-anyos nga mangunguling sa Barangay Baye, Lungsod sa Asturias dihang silang duha nangahubog na sa ilang panag-inom kaniadtong Martes.
Matud ni SPO1 Douglas Maravillas sa Asturias Police Station nga ang biktima nga si Teofilo Celin nakaangkon og samad tinigbasan sa iyang ulo ug uban pa nga bahin sa lawas.
Ang giingong nipatay sa biktima mao sila si Marlon Celin, kinsa mitahan ra usab hinoon dayon sa kapolisan human niya mapatay ang iyang papa.
Nahibaw-an nga ang biktima ug duha niya ka anak nga sila si Marlon ug Jeffrey nagdungan pa sa pagpaniudto. Human sa ilang paniudto, nagkasabot ang tulo nga mag-inom.
Dihang nangahubog na sa ilang giinom, si Teofilo mipadayag na sa iyang pagmahay ngadto sa iyang asawa nga giingong nakiglambigit og laing lalaki.
Gibadlong ni Marlon ang iyang amahan nga dili na lang hisgotan ang maong isyu, apan miinsister gyud si Teofilo ug maoy hinungdan nga sila nagkalalis.
Ang igsuon ni Marlon migawas kay nakabantay siya nga init na kaayo ang panaglalis sa iyang amahan ug igsuon. Wala na makaagwanta sa ilang panaglalis, si Marlon mikuha’g sundang ug gitigbas ang amahan.
Si Marlon gitanggong karon sa prisohan sa Asturias ug giandaman na og kaso nga ipasaka batok kaniya sa hukmanan. (RUB) (BANAT NEWS)
- Latest
