Duha ka guwardiya nagpinusilay ug nangamatay

CEBU, Philippines — Nangamatay ang duha ka guwardiya nga nagpinusilay duol sa usa ka gasoline station sa North Reclamation Area (NRA) nga sakop sa Barangay Mabolo, Dakbayan sa Sugbo. Sila si Juniper Teniano ug Anjen Lagmay, pulos sakop sa Black Arrow Security Agency, nadestino sa usa ka gasoline station ug matud pa nagkalalis nga misangpot sa pinusilay lapas sa tungang gabii niadtong Martes.

Matud sa mga imbestigador sa homicide section sa Cebu City Police nga nakit-an dapit sa nahagbaan sa mga guwardiya ang usa ka 9 mm. ug 45 kalibre nga pistola.

Si Mabolo Police Chief Dindo Juanito Alaras miingon nga si Lagmay nahagba gawas sa tindahan ug may pinusilan sa iyang lawas, samtang si Teniano natumba usab sa unahan nga bahin nga may samad sa ulo.

Ang kapolisan miingon nga nakasakmit usab sila og kagamitan sa pagsuyop og shabu didto sa crime scene. Ang kapolisan mohimo pa og dugang imbestigasyon. (RUB) (BANAT NEWS)