“Isumbong ni CD” epektibo kayo
CEBU, Philippines — Gihulagway nga epektibo ang pamaagi ni Cebu City Police Director Royina Garma nga pag-awhag sa katawhan nga mo-report kaniya sa ilang nahibaw-an nga mga ilegal nga kalihokan.
Wala pa gani maabti og 24 oras, nagpusot-pusot na ang inpormasyon nga nadawat sa kapolisan pinaagi sa Facebook page nga “Itug-an ni CD” ang mga ilegal nga binuhatan nga gusto nilang maaksiyonan sa mga polis.
Si Senior Inspector Arieza Otida, ang tigpamaba sa Cebu City Police Office miingon nga 13 ka tawo ang nihatag dayon kanila og report.
Ang uban nagpakisayod kabahin sa mga ordinansa nga gipatuman sa kapolisan, aron nga sila masayod ug dili makahimo og kalapasan.
Giawhag hinoon ni Otida ang katawhan nga mas labing maayo nga tawgon gihapon ang labing duol nga police station kay dili malikayan nga usahay walay internet connection ang ilang opisina.
Gipasalig ni Otida nga tagdon dayon nila ang mga report nga ilang madawat kon kompleto lang kini sa gikinahanglan nga kasayuran.
Ang katawhan makatawag sa cellphone number sa CCPO pinaagi sa 0966-465-2556 ug 0918-268-2846. RUB (BANATNEWS)
- Latest