City magtukod og pito ka eskuylahan
CEBU, Philippines — Aron mamenus ang pagdasok sa mga estudyante sa mga tunghaan, ang Siyudad sa Sugbo magdugang og pito ka mga tunghaan para sa high school ug elementarya sa nagkalainlaing mga barangay.
Si Konsehal Joy Augustus Young, Deputy Mayor for Education miingon nga nakita ang panginahanglan nga magtukod og dugang tunghaan kay naghuot karon ang mga eskuylahan sa kadaghan sa mga estudyante.
Nagkanayon si Department of Education Cebu City Assistant School Division Superintendent Danilo Gudelosao, base sa initial record sa mga enrollees ning tuiga miabot sa 222,000 ka tinun-an.
Sigon ni Gudelosao matag school year dunay 2-percent nga pagsaka sa gidaghanon sa mga tinun-an gikan sa naandan nga 175,000 enrollees.
Si Young nagkanayon nakakita na ang siyudad og lugar kon diin ang mga dugang tunghaan tukuron kini naglangkob sa Barangay Inayawan, Pasil, Capitol-Site, Lahug, ug San Jose. Sa pito ka barangay duha ka elementary schools ang tukoron diha sa San Jose ug Capitol Site. Dunay tulo ka high school sa Capitol Site, Lahug, Pasil ug Inayawan. Usa ka senior high diha unya sa Barangay Inayawan.
Ang Konsehal miingon ang siyudad maoy moabaga sa bayrunon sa lot acquisition ug ang DepEd sa construction expenses.
Ang mga tunghaan sa siyudad nga naghuot karon mao ang Guadalupe Elementary School, Pasil Elementary School ug uban pa.
Base sa records adunay 69 ka elementary schools, 57 high schools ug 49 ka senior high schools ang siyudad.
Si Young miingon mohangyo kini sa City Planning ug Development Office aron mohimo og program of works and estimates (POWE)sa proposed dugang nga mga school buildings.
Malaumon si Young nga sa 2019 ngadto sa 2020 maablihan na kining maong mga bag-ong tunghaan. (BANAT NEWS)
- Latest
