Diamante posibleng modagan pagka-kongresista

CEBU, Philippines — Wala gisalikway ni Tuburan Mayor Democrito "Aljun" Diamante ang posibilidad nga modagan pagka kongresista sa trisero distrito sa lalawigan sa Sugbo.

Matud ni Diamante nga mag-agad siya sa iyang partido nga Partido Demokratiko Pilipino -Lakas ng Bayan  (PDP-Laban) sa ilang desisyon.

Sa pagkakaron ang plano ni Diamante mao ang pagdagan isip bise mayor sa lungsod samtang ang iyang igsuon nga si Danilo kinsa maoy bise mayor karon sa Tuburan maoy iyang ituboy pagka mayor sa lungsod sa midterm eleksyon sunod tuig.

Kini aron nga mapadayon ang mga programa ug proyekto nga iyang nasugdan sa lungsod. Si Diamante anaa na karon sa iyang ikatulong termino isip mayor sa Tuburan.

Samtang andam si Bise Gob. Agnes Magpale nga motabang pangita og running mate ni Gob. Hilario Davide III sa sunod nga eleksyon kay di na siya mokandidato pag-usab kay mopahuway na siya sa politika.

Matod ni Magpale maayong mas bata ug abtik ang makatabang ni Davide sa mga programa ug proyekto niini sa lalawigan ug manalipod sa kababayen-an. (/IBM)(BANATNEWS)