Osmeña nakauyon kang Doria
CEBU, Philippines – Nakauyon gyud si Cebu City Mayor Tomas Osmeña kang Senior Superintendent Joel Doria isip City Director sa Cebu City Police Office ug kon siya maoy pabut-on dili niya kini pahulipan.
Si Doria nilingkod sa CCPO niadtong Hulyo 13, 2016 ug mahuman ang iyang duha ka tuig nga tour of duty sa dakbayan karong Hulyo 13 ning tuiga.
Matud ni Osmeña ‘the best police chief’ sa CCPO si Doria tungod sa mga kalampusan ilabi na sa kampanya batok sa ginadiling drugas.
Gipaandam ni Osmeña ang summary report labot sa kalampusan sa ilang mga operasyon aron masayod ang mga Sugbuanon sa iyang kontribusyon.
Giingong nakadawat na si Osmeña sa upat ka mga pangalan nga papilian aron ihulip kang Doria.
Bisan pa og ganahan siya ni Doria si Osmeña miingon nga wala siya’y plano nga mohangyo nga kini ipabilin kay dili kini makaingayon alang kang Doria.
“No, they will not do that, but it’s also not fair to him because they are affecting his career. He stay in one place it will affect your career, everyone will overtake him and he’s done a good job. He should be a chief PNP if you ask me,” sigon ni Osmeña.
Si Doria sa iyang bahin, miingon nga mosunod ra siya sa kamandoan gikan sa ilang labaw.
Giklaro hinuon niya nga nilampos ang ilang mga operasyon batok ilegal nga drugas kini tungod sa pagkugi sa mga station commanders.
Siya nagtuo nga bisan kinsa pay mopuli kaniya basta mangugi gihapon sila molampos gihapon sila. (/IBM)(BANAT NEWS)
- Latest
