Kuwang nga P100 milyon sa CICC impason sa Hunyo 30

CEBU, Philippines – Kuwangan na lang og P100 milyones ang Dakbayan sa Mandaue sa pagpalit sa kontrobersiyal nga Cebu International Convention Center (CICC) gikan sa Kapitolyo.

Matud ni Emmanuel “Manny” Guial, assistant provincial treasurer, nga kun mabayran na sa lokal nga kagamhanan sa Dakbayan sa Mandaue ang kuwang niini hingpit na usab nga mapanag-iya sa dakbayan ang CICC.

Ang Kapitolyo nibaligya sa CICC og P300 milyones ngadto sa siyudad sa Mandaue.

Ang dakbayan kinahanglan mobayad sa kuwang kutob karong Hunyo 30.

Una na nga nakabayad ang siyudad sa Kapitolyo og P200 milyones niadtong Enero.

Plano sa dakbayan nga makig-partner sa pribadong kompaniya o grupo alang sa pag-develop sa maong edipisyo alang sa economic activities niini.

Sa bahin sa probinsiya, ang halin gikan sa CICC adto paingon sa general fund sa kagamhanan diin ang P200 milyones matud ni Guial alang sa pag-develop sa provincial hospital sa Dakbayan sa Carcar. (Le Phyllis F. Antojado/GMR)

Garcia mokiha gyud kang Osmeña

Giawhag ni Konsehal Raymond Alvin Garcia si Cebu City Mayor Tomas Osmeña nga ihunong ang operation sa V-hire terminal sa may Barangay Kamagayan kay matud pa ilegal kini.

Si Garcia kinsa nipasaka og kaso batok sa mayor sa buhatan sa Ombudsman niadtong Marso sa niaging tuig niingon nga ang padayong pag-operate sa terminal nakalapas sa ordinansa nga nag-regulate sa mga terminal sa mga public utility jeepneys ug V-hire sa siyudad.

“Karon, iyang gibutang diha sa tapad gyud sa San Carlos, so mo-file ko’g kaso ana because siya mismo naghimo sa anang ordinansa niya siya mismo nag-break karon sa maong ordinansa. Nalipay na unta ko nga iyang itangtang, nga iya na unta ihunong karon iya na sab ibalik, well wala tay mabuhat ana, so anyway whatever happens kung sa kuan pa kung criminal law pa, the crime has been committed so whether or not iyang tangtangon o dili ipadayon gyud ang kaso,” asoy pa ni Garcia.

Gibakwi sa mayor ang iyang desisyon nga ipasira ang terminal human si Gobernador Hilario Davide III nihangyo tungod kay daghang Sugbuanon ang nakabenepisyo sa terminal.

Gikalipay sab sa mga V-hire drivers ang desisyon sa mayor tungod sa maayo nilang kita itandi sa unang terminal nga mingaw. Ang V-hire terminal sa Barangay Kamagayan nagsugod sa pag-operate niadtong Oktuber 2016 diin ang siyudad nikita og P400 mil matag buwan. (/GMR)(BANAT NEWS)