Polis sa Consolacion nga giingong nangilkil, na-entrap

CEBU, Philippines – Usa ka aktibong polis sa Consolacion Police Station ang gidakop atol sa entrapment operation didto sa usa ka mall sa Barangay Ibabao Estancia, Dakbayan sa Mandaue kaniadtong Martes sa hapon, sa akto nga midawat sa giingong gidemanda niyang kwarta gikan sa tag-iya sa cellphone nga iyang kinit-an.

Si SPO2 Vicente Gila Jr. mag-atubang og kaso tungod sa pagpangilkil niya og P10 mil gikan ni John Vincent Rafols, 22, lumad nga taga Davao City, ug temporaryo nga nag-check in sa usa ka hotel sa Barangay Talamban.

Nasagmuyo kaayo si Police Regional Director Debold Sinas kay bisan og dako na ang sweldo sa polis karong panahona, apan si SPO2 Gila mihimo gihapon og pagpangilkil.

“We are very frustrated, this is a very bad example of a policeman,” matud ni Sinas.

Ang hepe sa Talamban Police station nga si Senior Inspector Alvin Llamedo miingon nga niadtong Domingo nagpa-blotter si Rafols nga nabiyaan niya sa taxi ang iyang Iphone 8.

Kaniadtong Martes, mibalik si Rafols ug mipahibalo sa kapolisan nga nakontak niya ang tawo nga nakakuha sa iyang cellphone, apan dili gyud kini mouli sa cellphone kon dili siya bayran og P10 mil.

Tuod, giubanan sa kapolisan si Rafols sa ilang panagtagbo sa usa ka mall ug nailhan gihapon nila si SPO2 Gila bisan og wala kini mag-uniporme.

Dihang gidakop na si SPO2 Gila sa mga polis sa Talamban, nagpaila siya nga polis sa pagtuo nga dili siya dayonon sa pagdakop.

Wala dayon masuta kon nganong nahipunta man kang SPO2 Gila ang cellphone ni Rafols nga nahibilin sa taxi.

Matud pa nga pasakaan og kasong robbery extortion si SPO2 Gila ug mag-atubang pa gayud siya og kasong administratiba nga posibleng makapataktak niya sa serbisyo. (Romeo T.  Limpangog/RUB)(BANAT NEWS)