Ang kaudtohon sa pamoksing ni Pacquiao

Ang kapopular sa tawo sa abilidad nga iyang nahuptan diha sa sports nga pamoksing, ikatandi sa kinaiyanhong pag-irog sa adlaw.

Gikan sa kagabhion, inig ka buntag ang adlaw mosilang sa silangan. Unya, mosaka hangtod sa kaudtohon.

Human sa kaudtohon, dili na siya makapataas pa, udto ra gyud siya kutob. Dayon, mosugod na og dailos hangtud sa iyang pagsawop.

Ingon niini ang kahimtang sa gitas-on sa nahibiling abilidad ni Manny Pacquiao sa natad sa pamoksing.

Ang peak time sa iyang kabantog, diin kutob sa iyang gikaparang nga mga boksidor, iyang gipakamang sa canvass, milabay na.

Gani, adtong tungora, ang walay pildeng Floyd Mayweather Jr., kinsa mipasiatab nga siya maoy ilhong “pound for pound king boxer” sa tibuok kalibutan tungod sa record niining no loss, hadlok man kaayong makigharong ni Manny sulod sa ring.

Bisa’g unsa na la’y gihimong pasangil sa hambogerong Floyd aron makalikay sa awhag sa minilyong boxing fans, kinsa mi-pressured pag-ayo ni Mayweather aron lang gyud mosukol ni Pacquiao.

Tuod man, nadayon ang gikaintapang away nilang duha.

Pero, ubos sa promosyon ni Floyd Mayweather, diin tanang pabor atua daan gihakop ni Floyd.

Ning higayona wala na si Pacquiao sa iyang “peak time” nga kakusgan ug kapaspas.

Gani, diha’y round nga na-corner ni Manny si Floyd, diin mihana og katulala ug kabarag ang negro.

Gustong Manny nga tumbahon na ang kaparang.

Gibuhos niya ang tanang kusog, kapaspas ug kalantip sa iyang abilidad pero pakyas siya, kay wala gyud niya mapahagba ang idlas ug tikasang black American boxer.

Niadtong gutloa, nakita ko nga mibahar na’g diyotay ang abilidad ni Manny.

Milapas na’g diyotay ang kakusog ug kapaspas sa mga kumo sa kaudtohon sa iyang boxing career