PRO-7 makig-alayon sa LGUs batok estambay
CEBU, Philippines — Makig-alayon ang Police Regional Office -7 sa mga local government units alang sa pagpatuman sa direktiba ni PNP Chief Albayalde paghipos sa mga estambay diha sa kadalanan.
“We have to tap, barangay, I-harmonize nato sa local ordinances. I-tap ang barangay and DSWD para di lang kami pag-implement ana,” sigun pa ni Chief Supt. Debold Sinas. Gitun-an nila karon ang mga lokal nga mga ordinansa sa mga lugar ubos sa PRO- 7 aron masigurong adunay ngipon ang ilang pagpatuman sa maong direktiba.
Gipadayag sa maong heneral nga dili sila mamroblema sa pwersa nga mopatuman niini sanglit adto kini itahas sa Police Mobile Patrol Group.
“Naa tay mobile patrol, naay mga areas pud na sila. Kung naa mo nag-standby sa mga mall, di mo sitahon, pero kung naa mo nag- standby sa mga ngitngit nga lugar mao toy sitahon,” butyag pa ni Sinas.
Sa pikas nga bahin, wala ray pagsupak si Cebu City Mayor Tomas Osmeña sa plano sa kapulisan.
“Let’s try it, if it doesn’t work then stop it, what’s wrong with trying it? Diri daghan kaayo estambay mga bata gyud, rugby-rugby sila sa Mango Avenue,”matud sa mayor.
Samtang si Gob. Hilario Davide III gustong ipaklaro ang guidelines kalabot niini. "I do not really know unsay pasabot sa tambay, mag-inom daplin sa dalan? Magsugal daplin sa dalan? Kana angay ‘guro dakoon, pero kanang maglingkod lingkod lang tingali, I'm not sure," matud ni Davide.
Nagtoo siya nga adunay mga lokal nga kagamhanan nga dunay vagrancy law ug curfews ug maoy gusto niya nga hugot nga ipatuman. Ang kapulisan sa Siyudad sa Talisay pinangulohan ni Supt. Marlu Conag miingon nga ila na kining gibuhat sa barangay Poblacion. Apan ila kining palapdan subay sa kamandoan. - Le Phyllis F. Antojado ug Gabriel Bonjoc (BANAT NEWS)
- Latest
