10 pusher, 2 user sikop sa Oplan Limpyo

CEBU, Philippines — Nasikop ang napulo ka pusher ug duha ka user og shabu sa managlahing takna sa Oplan Limpyo sa  walo ka barangay sa Dakbayan sa Danao niadtong Sabado sa gabii.

Si Police Superintendent Jaime Quiocho Jr., hepe sa kapolisan sa Dakbayan sa Danao, niila sa napulo ka pusher nga sila si Patrick Alerta Matugas, 23; Janica Capuyan, 23; Aquilles Jore, 37; Noel Amplokio, 29; Jonathan Gonzaga, 39; Adrian Calzada, 23; Daryl Nuñez, 22; Bernard Mojado Roble, 39; Jenifer Sangotan, 23, ug Keith Vincent Perez, 29, kinsa pulos nadakpan sa buy-bust operation nga gihimo.

Si Police Officer 3 Phil Restauro maoy nangulo sa Oplan Limpyo nga ilang gipahigayon ubos usab sa kamanduan ni Supt. Quiocho niingon nga positibo ang mga taho nga ilang nadawat ug maoy nakaaghat kanila sa pagpasiugda sa buy-bust sa mga barangay sa dakbayan nga naglakip sa Guinsay, Dunggoan, Tabok,  Poblacion, Sabang, Taytay ug Maslog.

Giila ni Restauro ang mga user og shabu nga ilang naaktohan nga nagsuyop og shabu nga naglakip sa duha ka babaye nga sila si Jakelin Laguna, 23, taga Barangay Suba, Dakbayan sa Danao ug Ferly Mae Hermosillas, 22, taga Barangay Guinacot sa mao gihapong dakbayan.

Si Restauro niingon nga ilang nasakmit gikan sa mga dinakpan ang 3.10 gramos nga shabu ug P3,100 nga salapi nga gituohang halin ug P1,000 nga marked money.

Dugang nga nasakmit nila ni Restauro ang kalibre .38 nga armas nga adunay sulod nga upat ka bala.

Ang mga dinakpan nga nagtingkagol na sa Danao City Jail ang gikatakda karong Lunes nga pasakaan og kaso. (BANAT NEWS)