Dugang polis palagputon sa CCPO

CEBU, Philippines — Hayan mapun-an pa ang mapalagpot nga mga polis gikan sa Cebu City Police Office sumala pa sa direktor niini nga si Senior Supt. Joel Doria.

“Meron tayong specific teams na ka-conduct ng surveillance. Bina-background check lahat ng personnel natin dito sa CCPO just to make sure na matatanggal lahat yang undesirable police officers dito sa CCPO,” matud ni Doria.

Kini kabahin sa mas gihingusgan nga internal cleansing sa Philippine National Police.

Gibutyag ni Doria nga daghan gihapong polis sa Dakbayan sa Sugbo ang subject sa surveillance nunot sa mga nadawat nga intelligence reports kabahin sa kalambigitan niini sa ilegal.

“Continuous ang campaign sa internal cleansing. Kung di ka marunong sumunod sa patakaran ng PNP umalis ka sa serbisyo,” bahad ni Doria.

Ang katapusang napalagpot mao ang kanhi deputy chief sa Guadalupe Police Station nga si Senior Insp. Raymond Hortezuela sa wala pa nakalas nunot sa giingong pagsukol atol sa buy-bust operation batok kaniya niadtong Domingo sa Dakbayan sa Mandaue.

Matud ni Doria nga nagpahigayon sila og kinalit nga drug test niadtong Mayo 7 apan taliwa nga nagnegatibo si Hortezuela, girekomendar gihapon nila sa Police Regional Office-7 niadtong Mayo 10 nga ibalhin gawas sa CCPO ang maong polis nunot sa mga report nga nadawat kabahin sa kalambigitan niini sa drugas.

Pagkasunod adlaw nigawas ang order sa PRO-7 nga pinirmahan pa sa kanhi direktor nga si Chief Supt. Robert Quenery nga ipalagpot ngadto sa Negros Provincial Police Office si Hortezuela apan anaa kini sa floating status didto. (Camille L. Pateres/GMR)

Escort ni Loot hayan maputlan sa pension

Hayan maputol ang madawat nga pension sa nadakpang retiradong polis nga si Insp. Jose Dupay, ang security escort ni Daanbantayan Mayor Vicente Loot.

Nadakpan si Dupay niadtong Martes sa hapon human masakping armado og duha ka kalibre .45 nga armas ug walay napakitang dokumento nga makakupot ug makadala siya og armas.

Tug-an pa sa tigpamaba sa Cebu Provincial Police Office, Supt. Virgilio Bayon-on, nga nadestino sa Barauen, Leyte ang maong polis ug didto na niretiro sa Daanbantayan Police Station isip Senior Police Officer 4.

“Pag nagretiro man gud, one rank higher maong na Inspector siya,” si Bayon-on niingon.

Human niretiro, nahimo siyang personal security escort ni Loot.

Samtang nagdagan ang kaso mamahimo pang makadawat sa iyang pension si Dupay apan kon mogawas na ang hukom sa korte, maputol na kini, sigun pa ni Bayon-on.

Matud pa nga gipaubos na sa ballistic examination ang mga armas nga nasakmit gikan sa maong polis aron masuta kon nagamit ba kini sa krimen kaniadto ug kung aduna bay criminal records kaniadto. (/GMR)(BANATNEWS)