Upat ka dinagkong operations ang gihimo sa kapolisan gikan kaniadtong Martes sa hapon ug hangtud kagahapon sa udto nga misangpot sa pagkasikop sa daghang pushers.
File
P10 milyong shabu sakmit, pushers nasikop
Rowena D. Capistrano (Banat) - June 14, 2018 - 12:00am

CEBU, Philippines — Dul-an sa P10 milyones nga kantidad sa shabu nasakmit sa kapolisan ug daghang drug pushers ang ilang nadakpan sa anti-drug operations nga gihimo nila sa Dakbayan sa Sugbo.

Upat ka dinagkong operations ang gihimo sa kapolisan gikan kaniadtong Martes sa hapon ug hangtud kagahapon sa udto nga misangpot sa pagkasikop sa daghang pushers.

Unang nadakpan sa buy-bust operation didto sa Sitio Tabasca, Basak-San Nicolas mao si Catalino Oliveros Jr., 37, nga nakuhaan og extra large plastic pack nga may shabu ug laing usa ka medium-sized plastic pack nga may shabu gihapon.

Matud sa mga sakop sa Cebu City PNP Drug Enforcement Unit nga ang nakuha nila gikan kang Oliveros motimbang og 300 gramos ug mokantidad kini og P3,540,000.

Si Cebu City Police director Joel Doria miingon nga si Oliveros mitug-an nga may kakunsabo siya nga tigbaligya og shabu nga tighimo og lapida sa menteryo sa Carreta.

Sa follow-up operation nianang pagka Martes sa gabii, nadakpan didto sa menteryo si Joel Castro, 44, ug nakuhaan kini og 19 ka medium-sized nga pakete sa shabu nga motimbang og 475 gramos nga mokantidad og P5,605,000.

Si Oliveros nadakpan na kaniadtong miaging tuig sa paghupot og ilegal nga drugas, apan nakagawas ra dayon sa prisohan. Didto sa City Jail nakahimamat si Oliveros og bigtime pusher. Ang shabu nga ibaligya nila ni Oliveros gikan sa Luzon ug dad-on kini dinhi sa Sugbo sa usa ka magpatuong turista nga magdala og dako nga backpack ug mosakay lang og barko.

Tungod sa kalang-og og baho sa mga bulingon sulod sa backpack, ang mga guwardiya dili na ganahang mo-inspection niini hinungdan nga makalusot ra ang shabu.

Ang dinakpan nga si Castro miingon nga gibilin ra kaniya ang maong mga drugas ug gihatagan siya og instruction nga ipasugat ang mokuha niini didto sa Hipodromo, ug bayran ra siya’g P3 mil.

Kagahapon sa buntag, laing duha ka pushers ang nadakpan sa buy-bust operation sa Pardo Police Station didto sa Sitio Sto. Niño, Barangay Inayawan.

Ang nadakpan mao sila si Efren Formentera Reyes, 37, ug ang gituohang iyang mga kakunsabo nga sila si Vincent Cabillon ug Ana Marie Languido.

Nakuhaan sila og 123 ka gagmay’ng pakete sa shabu nga kantidad og P212 mil ug .38 kalibre nga revolver. Paglabay sa kapin tulo ka oras, nadakpan usab didto sa Sitio Laurente, Barangay Tejero ang 23-anyos nga babaye tungod sa paghupot og drugas.

Si Elyn Villasura, taga Tejero, nakuhaan og 20 ka gagmay’ng pakete sa gituohang shabu nga kantidad og P17 mil.

Talisay City

Tulo ka durugista ang nasikop sa mga polis sa Talisay City niadtong Martes. Ang unang operasyon gihimo didto sa Sitio Magay, Barangay Tangke alas 10 sa buntag.

Si Romeo Tillo, 40, nagpuyo sa maong lugar nasikop ug nakuhaan og walo ka gagmay’ng pakete sa shabu nga balor og P8 mil. Laing operation gihimo sa Sitio Tunga, Barangay Tanke ug nasikop na usab si Danny Bacus, 20, taga Barangay Lawaan 3 ug nasakmitan og pito ka paketeng shabu kantidad og P3,500.

Mga alas 8:30 sa gabii, laing operation ang gihimo sa Sitio Sawsawan, Barangay Tanke ug nasikop na usab si Ramil Amahos, 27, nga nasakmitan og unom ka gagmay’ng pakete sa shabu kantidad og P3 mil.

Ang kapolisan sa Talisay nakasakmit na og mga P5 milyones nga kantidad sa shabu sa 106 ka anti-drug operations nga gihimo sa kapolisan nga misikop sa 146 ka drug suspects. (Gabriel Bonjoc ug Camille L. Pateres/RUB)(BANATNEWS)

 

SHABU
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with