Duha patay sa pagpamusil

CEBU, Philippines — Duha ang patay ug laing tulo ang naangol sa managlahing insidente sa pagpamusil sa Siyudad sa Sugbo ug Mandaue niadtong Huwebes sa gabii ug Biyernes sa kaadlawon.

Ang gipusil patay diha sa Sitio Latasan, Barangay Labogon,  Dakbayan sa Mandaue  giila ni Police Officer 2  Lemar Pontillas sa Presinto 3 sa Mandaue City Police Office (MCPO) nga mao si Joly Melendres, nagpuyo sa maong dapit.

Matud pa ni Pontillas nga nagtan-aw og telebisyon sud sa ilang balay ang biktima dihang gisulod sa wala mailhing lalaki ug gipusil kini sa makadaghang higayon. Ang kapuyo sa biktima nga si Cherry Mae mitug-an sa kapolisan nga paspas kaayong nakasibat ang mamumuno.

Ang mga imbestigador sa Presinto 3 sa MCPO  naghimo pa og pakisusi sa pagsuta sa hinungdan sa maong pagpamusil.

Patay usab ang usa ka 18 anyos nga lalaki nga giila sa pangalang Jason Pamatian,  taga Sitio Kadianoy, Barangay Subangdaku sa dakbayan sa Sugbo niadtong Huwebes sa gabii human gipusil sa giingong kaaway niini. Mitug-an sa kapolisan si Roger Sucang, uyoan sa biktima,  nag-inom sila sa ilang mga kabanay sa usa ka waiting shed sa kilid sa karsada sa dihang adunay motor nga mihunong pipila ka metros ang gilay-on gikan kanila. Miduol ang usa ka lalaki nga nailang si Elton Quimbo, 27, taga Sitio Santolan sa maong barangay ug gipusil ang biktima sa walay igong hinungdan.

Ang biktima nakaangkon og samad pinusilan sa dughan apan nakadagan pa kini sa unahan apan didto natumba.

Human niini, gipanghulga sila sa suspek nga apilon sa pamusilon ug daling misakay og balik sa motor ug miikyas. Dali nga miresponde ang Guadalupe Emergency Response Team (GERT) sa maong insidente apan wala na matabang ang biktima. Giingong adunay panagbingkil ang biktima ug ang suspek.

Samtang tulo ang naangol sa pagpamusil sa duha ka wala pa mailhing mga lalaki diha sa General Maxilom Extension sa Barangay Carreta. Ang biktima giila nga sila Junme Marino, 32, sidewalk vendor, Dexter Marino, 30, ug usa ka 7- anyos nga batang libud-suroy nga napagan.

Matud pa sa kapolisan, namaligya si Marino kilid sa karsada sa dihang adunay mihunong nga motor sa atubangan sa tindahan ug kalit silang gipamusil sa makadaghang higayon.

Nakaangkon og samad pinusilan sa lain-laing bahin sa lawas si Junme ug Dexter samtang napagan usab ang 7-anyos nga batang natulog sa sidewalk.

Padayun pa ang imbestigasyon sa kapolisan  bahin sa maong pagpamusil. Shaira Gwen T. Laluna, CNU Intern/IBM (BANAT NEWS)