30 nasikop, P1.5 milyong shabu nasakmit

CEBU, Philippines – Mokabat sa P1.5 milyones ang nasakmit nga shabu gikan sa managlahing buy-bust operation sa kapolisan sa Dakbayan sa Danao ug  Lungsod sa Liloan nga niresulta sa pagkasikop sa 30 ka tawo ug lakip sa usa ka Taiwanese sa Dakbayan sa Lapu-Lapu.

Si Senior Police Officer 1 Arnold Labine sa Danao City Police Station nibutyag nga ilang gipahigayon ang operasyon sugod alas 8 pasado sa gabii niadtong Miyerkules hangtud alas 2 pasado sa kaadlawon niadtong Huwebes sa Tabok-Maslog, Poblacion, Tabok-Looc ug Suba.

Nasakmit ang mokabat sa P1.3 milyones nga shabu samtang nasikop ang 20 ka pushers ug tiggamitan uban sa pagkasakmit sa armas nga kalibre 22 revolver ug mga bala.

Giila ni Labine ang mga nadakpan nga pusher nga sila si Mark Gala Lucero, 29; Babylane Almacin, hingkod; Eric Aguilar, 35, pulos taga Tabok-Maslog.

Dugang nadakpan mao sila si Alexter Calbaro, 32, taga Canamocan, Compostela; Jeffrey Mahinay, 24; Maria Durano, 56, taga Maslog, ug naaktohan usab ang mga nagsuyop nga sila si Arnold Taneo, 38, taga Liloan; Tomas Rosal, 40; Joseph Gerevase, 46, taga Magay, Compostela; Nipol Malagapo, 22, taga Tabok, Lamac sa maong dakbayan.

Nadakpan sab sila si Anthony Gorre, 35; Keneth Malven Yongco, 35, taga Poblacion; Niño Mametes, 27, taga Looc; Christian Aroma, 24; Arnold Gallego, 22, ug 17-anyos nga babaye nga taga Guinsay.

Laing nadakpan mao sila si Reynar Gallera, 30, taga Dakbayan sa Toledo; Noli Granada, 30; Clarisa Manulat, 26, taga dalan Duterte, Dakbayan sa Danao.

Nasakmit gikan sa mga dinakpan ang 40 ka gagmay nga pakete, usa ka daku ug duha ka medium-size nga putos sa shabu ingon man P12,000 nga kwarta.

Taiwanese sikop

Samtang sa gihimo nga anti-illegal drug operation sa mga sakop sa City Drug Enforcement Unit (CDEU) ug City Intelligence Branch (CIB) sa Lapu-Lapu City Police Office (LLCPO) maoy nadakpan ang 18-anyos nga si Melvin Zafra Daño nga taga Sitio Masiwa, Marigondon ug nasakmit gikan niini ang napulo ka gagmay nga pakete sa shabu nga kantidad og P9,912.00.

Si Police Senior Inspector Genesis Aniversario niila sab sa Taiwanese nga ilang nadakpan nga si Gary Yu, 46, ug nasakmit ang siyam ka gagmay nga pakete, usa ka medium-size nga ang tanan mokabat sa P76,520 uban sa P2,000 nga kwarta.

Sa Sitio Lawom, Cadaruhan, Borbon nadakpan sa buy-bust operation si Ruperto Mangubat nga nakuhaan og tulo ka gagmay nga pakete sa shabu, P500 nga buy-bust money ug P2,000 nga gituohang halin.

Counseling

Samtang dili mominus 15 ka drug surrenderees sa Tangke, Dakbayan sa Talisay ang nitambong sa dialogue nga gipahigayon sa hepe sa Talisay City Police Station niadtong Miyerkules sa hapon nga gipangulohan ni Supt. Marlu Conag.

Matud ni Conag nga gipahigayon nila ang counseling ug pagsusi sa kahimtang sa mga nitahan.

Gipatawag ni Conag ang maong tigum tungod kay kadaghanan sa mga nasikop mga kanhi nitahan na sa ilang kaugalingon apan nibalik sa pagkalambigit sa ilegal nga kalihukan.

Suportado sa komunidad

Sa laing bahin mas paspas na ang pagresponde sa kapolisan sa mga operasyon batok sa ilegal nga drugas sa Lalawigan sa Sugbo tungod sa suporta sa komunidad.

“Dali ra ang atong pagresponde, aktibo kaayo ang atong mga kapolisan gumikan sa kooperasyon sa atong mga sibilyan,” matud ni Supt. Virgilio Bayon-on, hepe sa Police Community Relations sa Cebu Provincial Police Office (CCPO).

Kaniadto maglisud sila sa pagdakop sa mga suspek sa mga sudlonon nga bahin apan karon suportado na sila sa katawhan. (Rowena D. Capistrano, Rafols E. Gervacio)(BANAT NEWS)