DA-7 nanghambog sa accomplishment

CEBU, Philippines — Gipanghambog sa Department of Agriculture (DA)-7 ang mga accomplishment sa Philippine Rural Development Project (PRDP) sulod sa kapin tulo ka tuig human kini gilusad.

Ang PRDP usa ka programa nga ipatuman sa sulod sa unom ka tuig diin nasugdan kini kaniadtong tuig 2014 ug gibana-banang matapos karong 2020.

Ang tumong sa maong proyekto mao ang pagtukod og moderno, value-oriented ug climate resilient agriculture ug fisheries sector. Si Cheryl Dela Victoria InfoACE unit head mibutyag nga nakompleto na nila ang programa sa farm to market road ngadto sa Sagbayan, Bohol.

Samtang si Melquiades Ibarra, I-support component head mibutyag nga aduna’y nagkalain-laing proyekto nga gisugdan dinhi sa Sugbo.

Ang maong mga proyekto gilangkuban sa duha ka I-build projects sa Sugbo, usa ka FMR sa lungsod sa San Remigio ug potable water system sa  lungsod sa Alegria.

Lakip usab niini, ang upat ka small livelihood projects diin duha niini naa sa San Remigio, usa sa lungsod sa Poro ug usa usab sa San Francisco, isla sa Camotes. 

Giawhag ni Ibarra ang uban pang LGU’s nga magsumitir og mga project proposal sa PRDP alang sa kaayohan ug benepisyo sa mga mag-uuma ug mananagat. (Ericalene S. Tanudtanud ug Cherry Ann F. Fornez, UV Journalism Interns/BDB)  (BANAT NEWS)