Tulo pilian ni Tomas sa SK federation
CEBU, Philippines — Aduna nay tulo ka chairman sa Sangguniang Kabataan ang gikonsiderar ni Cebu City Mayor Tomas Osmeña nga himoong presidente sa SK Federation Election karong Mayo 28. Sumala pa sa mayor nga pulos maayo ug bright ang tulo ka aspirants kinsa gradwado nga cum laude ang duha niini ug na-interview na kini sa iyang mga staff.
Apan si Osmeña niingon nga dili importante ang qualification sa iya tungod kay siya mismo ang mobansay.
“Time will only tell as you test them and what they’re good at but there are many important consideration, one of which is how they can motivate the others,” matud sa mayor.
Sa laing bahin, si Bise Mayor Edgardo Labella niingon nga dili siya manginlabot bahin sa SK Federation Election ug iyang hatagan og higayon ang mga SK leaders nga modesisyon.
“Let’s give them the privilege of determining among themselves. Let us teach them self-governance and for them to decide among themselves without intervention from the elders,” sigun sa bise mayor.
Sa laing bahin gipaubos sa mandatory training ang mga napili nga opisyal sa SK sa 30 ka barangay sa Dakbayan sa Lapu-Lapu.
Ang city director sa Department of Interior and Local Government (DILG), John Joan Mende, maoy nangulo sa pagpasiugda sa training nga molungtad og tulo ka adlaw uban sa National Youth Commission (NYC).
Matud ni Mende nga ang maong leadership training mahinungdanon kaayo sa mga opisyal sa SK tungod kay dako kini og ikatabang aron usab sila magmalampuson sa ilang pagserbisyo sa mga batan-on sa ilang lugar.
Si Mende niingon nga human sa maong training isunod sab ang pagpili sa mga opisyal sa SK Federation diin ang presidente molingkod sa konseho sa dakbayan. (Jessa V. Caumeran, CNU Intern GMR) (BANAT NEWS)
- Latest
