Osmeña wa modawat sa hagit sa pag-umangkon

CEBU, Philippines — Wala dawata ni Cebu City Mayor Tomas Osmeña ang hagit sa iyahang pag-umangkon Konsehal Renato “Junjun” Osmeña nga mopaubos silang duha og lie detector test aron mahibaw-an kun kinsay nagsulti sa tinuod.

Kini may labot sa isyu nga matod pa gisyagitan sa mayor ang iyang pag-umangkon dihang nag-abot sila sa usa sa mga dakong hotel sa siyudad kon diin si Presidente Rodrigo Duterte nakigkita sa mga mayor alang sa private dinner niadtong Sabado.

Ang mayor miingon nga kon gisyagitan pa niya ang konsehal daghan unta ang makadungog ug nakakita sa hitabo.

“I don’t have to do that, he just listen to the circumstance I shouted at him in the lobby how come nobody else heard? That’s in the lobby of Waterfront hotel nobody else heard, who’s lying?” matud sa mayor.

Apan ang konsehal miingon nga dili siya maghimo og estorya nga makaguba sa iyang relasyon ngadto sa iyang uyoan.

“Naay nakadungog lain, nakadungog gani si Daluz ug mga ubang tawo nakadungog. As I told you what would I get out of it?

I mean, who am I to create something with my uncle who I love and respect, until now?” sigon sa konsehal.

Samtang gidepensahan usab ni Konsehal Margot Osmeña ang iyang bana nga mayor.

Matud niya imposible nga miisa og tingog ang mayor sa hotel nga daghang tawo.

Nasuko ang mayor sa pag-umangkon tungod kay mao kini ang niuna pagbotar aron dili aprubahan ang P18 billion development project sa Kawit Island sa South Road Properties nga gitinguha sa mayor.

Ang maong konsehal maoy nangulo sa ad hoc Committee nga maoy nitan-aw sa proposed Kawit Development Project nga gibasura sa konseho sa siyudad.  (IBM) (BANAT NEWS)