Maestra gisugat og mga basura pagbukas sa classroom
CEBU, Philippines — Mga basura ang nisugat sa usa ka magtutudlo dihang iyang gibalik ang iyang lawak saringan aron modawat sa mga tinun-an nga magpa-enroll.
Nasagmuyo si Maria Elena Pahang sa iyang nakita tungod kay nagkaguliyang ang iyahang classroom hinungdan nga gikuhaan niya kini og hulagway ug gi-post diha sa iyang account sa facebook.
Ang iyahang classroom gigamit isip polling precinct atol sa Sangguniang Kabataan (SK) ug Barangay Elections niadtong Mayo 14.
Gani, sa wala pa niya kini gitugyan ngadto sa mga tawo nga mogamit sa iyahang classroom iyaha pa kining gilimpiyohan.
Apan wala niya damha nga ang mosugat niya kagahapon pag-abli niya sa iyahang classroom ang mga basura sama sa sudlanan sa pagkaon, plastik, sudlanan sa juice ug uban pa.
Gawas kang Pahang aduna pay laing magtutudlo kinsa nikomentaryo sa post nga nanawagan sa mga tawo nga nigamit usab sa iyang classroom tungod kay susama sa kang Pahang gisugat usab siya og mga basura diha sulod sa iyang classroom.
Gituohan sa magtutudlo nga ang mga basura mga kinan-an kadto sa mga watchers ug gipangbiyaan lang. (BANAT NEWS)
- Latest