Di manangtang sa posters ikiha ni Luigi

CEBU, Philippines — Nibahad si Mandaue City Mayor Gabriel Luis “Luigi” Quisumbing sa pagpasaka og kaso sa mga kandidato sa niaging eleksiyon sa Barangay ug Sangguniang Kabataan nga dili manangtang sa ilang campaign posters hangtud Lunes sunod semana.

Kalapasan sa Anti-Littering Ordinance ang mahimong atubangon nga kaso sa mga hingtungdan.

Nagpasalamat hinoon siya nga daghan na ang mga gipanangtang nga mga campaign posters.

“Kay nilansar sila with the assumption nga ganahan sila mo-serbisyo sa Dakbayan sa Mandaue ug motabang sa atong efforts and policies especially in the field of keeping Mandaue clean and green. So we want to make sure that they will uphold their commitment by removing all of the campaign materials in their areas,” matud ni Quisumbing.

Ubos sa maong ordinansa, ang makalapas multahan og gikan sa P1,000 hangtud sa P5,000.

Pwedeng dili tangtangon kadtong gibutang sa pribadong lugar ingon man balay sa kandidato.

“Of course, there will be some candidates and some candidates’ supporters na ganahan ipabilin ang mga posters sa ilahang mga kandidato sa barangay since these are private property, of course, they are free to do so,” matud niya. (BANAT NEWS)