Talisay Police nagbantay sa armadong grupo
CEBU, Philippines — Wala mokompiyansa ang kapulisan sa dakbayan sa Talisay pagmonitor sa dautang elemento nga mohimo og kagubot ilabi na sa posibleng pagbalik sa mga rebeldeng New People’s Army tungod sa nahitabo didto sa Bohol.
Si Insp. Rene Cerna, deputy chief sa Talisay City Police Station nibutyag nga gipangusgan nila ang pagpanguha og impormasyon bahin sa mga kalihokan ilabi na diha sa kabukiran.
Ang Talisay City mahimong tabukon sa dagat gikan sa Bohol hinungdan nga gipangusgan sa TCPS ang pakig-alayon sa mga residente diha sa kabaybayonan niini aron mabantayan kon dunay mangabot nga mga dayo.
Gawas sa Negros Island ang Bohol nga dugay nga nadeklarar nga insurgency free subling gihasi sa mga armadong grupo nga giingong mga sakop sa Communist Party of the Philippines- New People’s Army (CCP-NPA).
Gani nagkaengkwentro gyud sa lungsod sa Bilar atol gyud sa eleksyon sa barangay ug SK sa miaging semana diin duha ka sundalo ang naangol.
Si Col. Ignacio Madriaga, commanding officer sa 302nd Infantry Battalion miingon nga nangabot sa maong probinsya ang mga rebelde sa pagtuong makakuha sila og suporta gikan sa mga tawo didto.
Apan ang mga residente sa maong lugar mao pa hinuon ang misumbong sa mga otoridad human sila nasigpatan sa lugar hinungdan nga gisusi sa mga sundalo ug nahitabo ang engkwentro. Si Madriaga miklaro nga bisan sa nahitabo, nagpabiling insurgency- free pa gihapon ang Bohol tungod kay wala nay makuhang suporta ang mga rebelde diha sa probinsya.
Sa pagkakaron, padayon ang pagpangita sa militar ug kapolisan sa maong grupo. Kahinumdoman nga gipakita sa mga taga Bohol ang panaghiusa dihang misuway og sud ang Abu Sayyaf sa ilang probinsya niadtong tuig 2017, apan tungod sa kooperasyon sa katawhan way nakagawas ug nahurot og kamatay ang mga terorista. - Pegeen Maisie M. Sararaña (BANAT NEWS)
- Latest