Russian nga nanglugos og unom ka bata gikiha

CEBU, Philippines — Nag-atubang na karon og kasong rape ug human trafficking ang Russian nga giingong nang molestya og unom ka mga minor de edad didto sa lungsod sa Consolacion.

Ang 45 anyos nga Russian nga si  Dmitri Nikuli nag-atubang karon og reklamong kalapasan sa Republic Act 9208 o “Anti-Trafficking in Persons Act of 2003” ug kalapasan sa Republic Act 8353 o ang The Anti-Rape Law of 1997.”

Ang maong langyaw gidala kagahapon sa Cebu Provincial Prosecutor’s Office aron pasakaan sa maong kaso ug siya gipaubos dayon sa inquest proceeding sa sala ni fiscal Ethel Miel.

Ang iyang kampo wala mohatag og komento kalabot sa kaso, apan gihatagan kini og pito ka adlaw aron moduso sa ilang counter affidavit.

Si Nikuli gidakop sa kapolisan sa Consolacion niadtong Biyernes human nga gisumbong nga nang molestiya og unom ka batang nag edad og 5, 8, 9, 11, 12 ug 16 anyos.

Ang maong mga bata nga babaye nagpuyo sa apartment ni Nikuli sa usa ka subdivision sa barangay Lamac lungsod sa Consolacion.

Sulod sa pipila ka semana didto usa ang mga biktima uban ang ilang mga ginikanan sanglit giingong naamigo na nila ang maong langyaw.

Apan niadtong Miyerkules ang inahan sa 9 anyos nga bata nakadungog na lang og syagit gikan sa ikaduhang andana sa apartment ni Nikuli.

Sa dihang pagkakita sa inahan, ang iyang anak nga wala nay sinina ug giingong gihilabtan ni Nikuli. Nitug-an usab ang mga bata nga makadaghan na kining gibuhat kanila sa suspek.

Kini ang hinungdan nga nisumbong ang inahan sa awtoridad ug didto mihimo og operasyon ang kapolisan.

Ang mga biktima uban sa ilang mga inahan biktima sa sunog sa Mandaue ug giingong mitanyag ang suspek nga adto lang una mopasilong kanila. Ang mga bata wala dayon motug-an sa pagpangabuso kanila sa suspek tungod sa kahadlok nga sila palayason. (BANAT NEWS)