Gikan sa disko gipamusil, usa patay

CEBU, Philippines — Patay sa pagpamusil ang usa ka lalaki nga gikan sa diskohan kuyog ang iyang mga ig-agaw atol sa kapistahan sa Sitio Ilaya, Cotcot, Lungsod sa Liloan niadtong Sabado sa kaadlawon.

Ang biktima mao si Jonathan Suralta Sotto, 29, residente sa Sitio Tabunok sa maong barangay, samtang ang suspek giila nga si Ulyses Tundag, taga Sitio Ilaya.

Matud ni SPO4 Marcelino Servilla nga kuyog ni Sotto sila si Rene Suralta, Arnel Ganar, Ramil ug Johnrey Celeste.

Samtang nagdisko, giingong tulo ka higayon nagpakita si Tundag nga hubog sa iyang gidala-dala nga pusil sa iyang hawak.

Sa ilang pagpamauli, giingong nagkupot na daan og botelya si Sotto aron pangdepensa apan kini nabantayan ni Tundag ug nisinggit nga pabuhian ang botelya apan wala paminawa.

Kini ang hinungdan nga nagsugod ang komosyon nga naglinabayay na og mga botelya ug bato ang duha ka habig. Pagkahuman, buwag nga nagdinaganay na ang mag-ig-agaw tungod sa kahadlok.

Matud pa sa usa kanila nga aduna pa siya’y nasugatang habal-habal nga maoy iyang nakit-an nga gisakyan ni Tundag nga nigukod kang Sotto ug nipusil.

Wala hibaw-i kung kinsa ang drayber sa maong habal-habal ug kung may kalambigitan ba kini sa panghitabo.

Tungod sa pagdinaganay, walay nakatumbok sa kapolisan kung kinsa ang nakapusil kang Sotto sa ilang pagresponde dihang nipahibawo ang mga tanod nga aduna silay nakaplagang patay.

Pagkabuntag giimbitar ang mga ig-agaw ni Sotto sa Liloan Police Station ug maoy niasoy sa panghitabo.

Daling gipangita sa kapolisan si Tundag apan ang kapuyo niini ang ilang naabtan sa panimalay ug wala sab sa balay sa iyang inahan.

Samtang laing pagpamusil nga niangol sa tulo ka tawo nga gikan sab sa disko nahitabo sa Mulao, Lungsod sa Compostela niadtong Domingo sa kaadlawon.

Si Senior Police Officer 1 Dino Caputolan sa Compostela Police Station niila sa mga biktima nga sila si Jaymar Juarez Quilantang, 24; Denmark Racho Ochea, 16, ug Aljon Quiño Monte, 34, pulos taga Basak, Lungsod sa Compostela.

Matud ni Caputolan nga gikan pa ang mga biktima nitambong og disko dihang kalit lang gipamusil sa nag-angkas og motorsiklo nga lalaki.

Ang mga biktima nga nakabaton og samad pinusilan dali nga gihatud sa Danao Provincial Hospital apan gibalhin kini sa tambalanan sa Dakbayan sa Sugbo. - Rafols E. Gervacio, CNU Intern (BANAT NEWS)