Underpass sa N. Bacalso sayo nga mahuman

CEBU, Philippines — Ang underpass project sa N. Bacalso Avenue sa siyudad sa Sugbo gikatakdang mahuman og mas sayo sa target nga petsa sa sunod tuig tungod kay giingong mahuman kini sa katapusan niining tuiga.

Tulo ka buwan kini nga sayo sa target date nga gitakdang paghuman sa maong proyekto.

Matud pa sa Division Chief sa Construction Division sa Department of Public Works and Highways -7 nga si Joselito Sayson nga 60 porsiyento na nga nakompleto ang underpass project.

Siya midugang nga nahimo kini tungod sa pagsige og padayon sa trabaho bisan og lapas na sa walo ka oras aron lang madali kini sa paghuman.

Ang maong proyekto nga gitukod gipanglantawang makatabang sa pagpamenus sa problema sa trapiko sa maong dalan padung sa habagatang bahin sa Sugbo.

Tungod sa maong proyekto, nisamot kagrabe ang problema tungod kay wala paagii ang pikas lane niini padung sa habagatan .“Atong gipapaspasan nila mao nang nag- trabaho sila more than eight hours a day. Ato silang gipa-overtime, they start earlier and they end later,” sumala pa ni Sayson.

Una niini, ang mga opisyales sa dakbayan sa Sugbo miawhag sa DPWH nga papaspasan ang pagtukod niini 24-oras  apan wala kini buhata sa kontraktor tungod kay nangreklamo ang mga residente gumikan sa kasaba sa mga makinaryang gigamit.

Gidugang ni Sayson nga ang proyekto daghan og gigamit nga mga ekipo ug makina ug menus lang ang gidaghanon sa mga tawo.

Ang maong underpass nga nagkantidad og P638 milyones kabahin sa “Build, build, build” program sa administrasyong Duterte nga ang tumong mao ang pagpalambo sa imprastraktura sa nasud. - Shainna Marie O. Edullantes, CNU Intern (BANAT NEWS)