Malasakit Center ipakatap tibuok nasud

CEBU, Philippines — Nagtinguha karon ang Malacañang nga himuong nationwide na ang gipabarog nga Malasakit Center diha sa Vicente Sotto Memorial Medical Center (VSMMC).

Mao kini ang gibutyag ni Special Assistant to the President Christopher “Bong” Go atol sa luncheon press conference kagahapon. Matud niya karong adlawa adunay susamang center nga tukoron sa Eastern Visayas Regional Medical Center sa Tacloban City.

Ang Office of the Presidential Assistant for the Visayas mao ang lead agency sa Malasakit Center nga gigamitan og pundo sa socio-civic funds sa Office of the President.

Matud pa ni Go gusto usab niyang adunay himuong one-stop-shop center sa Bacolod City ug Iloilo City.

Sa press conference kagahapon, nitumaw usab ang posibilidad nga magbutang usab og susamang center sa mga provincial hospitals.

Apan si Go miingon nga kinahanglan pa niyang pakigkitaan ang kalihim sa Department of Health ilabi na nga pwerteng daghana sa mga provincial hospitals sa nasud.

“Kanang provision sa provincial hospitals, estoryahon nako si DOH Secretary Duque,” matud pang Go.

Sa iyang bahin, si Presidential Assistant for the Visayas Michael Lloyd Dino  mibutyag nga kagahapong adlawa miabot na og 13 mil ka tawo ang nakabenepisyo sa Malasakit Center sa VSMMC sukad nga kini gibuksan niadtong Pebrero ning tuiga.

Ang Malasakit Center sa VSMMC adunay pundo nga P50 milyones kada buwan gikan ni Presidente Rodrigo Duterte.

Ang socio-civic funds sa presidente nagagikan sa nakolektang sin taxes sumala pa ni Department of Foreign Affairs (DFA) Secretary Alan Peter Cayetano.

Ang maong center usa ka one-stop shop nga gilangkoban sa nagkadaiyang ahensya sa gobiyerno nga mapangayoan og hinabang sa pamilya sa mga pasyente sama sa Department of Social Welfare and Development (DSWD), Philippine Health Insurance Corp. (PhilHealth), Philippine Amusement and Gaming Corp. (PAGCOR), ug Philippine Charity Sweepstakes Office (PCSO).

Matud pang Dino sa sayo pa nga ang Cebu mao ang ilang pilot project apan kon magmalampuson kini ilaha kining ipatakod sa ubang bahin sa nasud.

Matud niya, ang maong programa para gyud sa mga kabus nga dili makakaya pagbayad sa tambalanan. (BANAT NEWS)