“Let god”

CEBU, Philippines — Gradwado siya sa kursong Nursing apan mas gipili niyang magnegosyo aron makatabang ngadto sa ubang tawo. Nakasuway siya nga matog sa Carbon samtang maninda, apan wala niya kini igsapayan aron lang nga makahalin siya ug makapanweldo sa iyang mga trabahante, kinsa nagsalig kaniya.

Tunokon nga dalan ang giagian ni Shaddilyn Esguerra, 26 anyos, taga Estaca, Compostela, Cebu, una niya napalambo iyang negosyo nga Twilight Delights.

Ikatulo si Shaddz sa walo ka managsuon. Magtinda og bisan unsa iyang amahan ug nagtrabaho isip production worker iyang inahan.

Lisod matod pa ang ilang pagpuyo kaniadto. Magluto og pancit iyang inahan ug ibaligya niya kini didto sa iyang trabahoan. Samtang maninda sab iyang amahan og bisan unsa nga pagkaon sama sa hotdog, peanut butter ug ice drop diin siya mismo ang mohimo.

“Kami tigputos ato, dugay me makatog mga igsoon samot na nga apason ang orders,”paambit pa niini sa Banat News Tingusbawan.

“Kung dili me motabang, wala man me makaon, pila ray sweldo ni mama as sewer,”dugang niya.

Nagtungha siya sa Estaca Elementary School diin usahay motungha siya nga wala’y balon.

“Hatagan me ni papa usahay tres, usahay wala,”niya pa kinsa nigradwar gyud nga 5th honorable mention bisan pa man nga naglisod sila sa pinansyal nga aspeto.

Nihit og high school sa ilang lugar kaniadto busa napugos iyang mga ginikanan nga patunghaon siya sa pribadong tunghaan, sa La Consolacion College.

“Three days sa wala pa ang periodical test, magsige nako’g pangayo ni papa, moana ugma na, unya igka ugma moana nasad nga unya na. Maglisod gyud kay daghan biya me,”niya pa.

Maayo na lang nga niining panahona, scrap buyer na iyang amahan og mga panapton sa MEPZA ug bisan dugay, makabayad gyud sila sa iyang matrikula.

Nindot gihapon og grado si Shaddz ug nigradwar gyud sa hayskul ug nipadayon og tungha sa University of San Carlos sa kursong Nursing.

Gipaambit niini nga sa nagtungha pa kay motabang siya sa iyang papa pagpaninda sa mga produkto niini aron makabayad siya sa iyang matrikula.

Nisamot ilang kalisod sa dihang naundang iyang papa sa pagpamalit og scrap nga mga panapton ug ang niabaga na sa iyang pag-eskwela mao ang iyang maguwang kinsa bag-o lang sab nakatrabaho.

Maglisod sab matod pa siya pangita og pamlite sa una gikan sa ilaha padulong tunghaan. Apan wala gyud siya nagpapildi sa mga suliran ug naningkamot nga makahuman sa kolehiyo. Ug tuod man, nigradwar gyud siya niadtong 2013 ug nakapasar sa board exam sa susamang tuig.

Nagboluntaryo siya isip nurse sa Danao District Hospital ug human sa usa ka tuig, nangaplay siya sa clinic sa Kapitolyo isip nurse apan wala nadawat. Daghan siyang giaplyan apan wala gyud siya nadawat.

Niining panahona naatol sab nga nasira ang gamay nilang bakery nga gidumala sa iyang iyaan. Ug dinhi siya nakahuna-huna nga siya ang mopuli kay nausikan siya sa pwesto.

“Bisan nga wala ko kahibaw unsay buhaton, naglakas loob ko,”asoy pa niya. Nakahukom siya nga mga biscuit iyang ibaligya didto. Nangutang siya og P100,000 ug mao kini iyang gipuhonan. Nagsugod gyud sila niadtong Pebrero 8, 2016 nga adunay rehistradong pangan sa Department of Trade and Industries nga Twilight Delights.

Una niyang baligya mao ang rosquillos ug salvaro diin iya kining ipanghagad sa mga tindahan.

Naglisod gyud siya unsaon pagpadagan ang negosyo sanglit dili man siya business graduate.

Pila ka buwan gikan sa pag-abli, gamay ra sila og kita ug puro sila gasto. Maong nakahukom siya nga mag-sideline og trabaho matag gabii isip nurse sa usa ka paanakan. Inig ka buntag magsuroy siya sa iyang baligya ug inigka gabii magtrabaho siya isip nurse.

“Wala gyud kaayo kay tulog, but you have to do it coz you have people,” niya pa. Hangtod nga nakahukom siya nga moabot og suroy sa nagkalain-laing mga lungsod sa amihanan ug habagatang dapit sa Sugbo. Nanghuwam siya og multicab ug siya mismo ang mag-drive niini. Niarang-arang ilang sales ug upat ka buwan gikan sa ilang pagsugod nipuno siya og laing duha ka mga tawo para moluto sa laing baligya nga bao-bao ug galleta. Mas nikusog sila sa dihang naka-supply siya sa mga canteens sa MEPZA ug nipuno na sab siya og laing tawo. “Ang business kay mohinay ug mokusog man gyud na,”niya pa.

Giasoy ni Shaddz nga aduna gyu’y panahon nga magsakit iyang ulo asa na siya og ipangsweldo sa iyang mga tawo. Naabot sab ang panahon nga iyang tagoan ang stocks para dili maguol iyang mga trabahante nga wala nahalin ang ilang baligya.

“Naay time nga maghinuktok ko. Pangutan-on ko sa akong mga tawo nga okay ra ba ko, moana ra gyud ko nga okay para dili sila ma- worry,”asoy niya.

Nangita siya og laing pamaagi nga mahalin ilang mga biscuits. Hangtod nga nakahukom siya nga mamaligya sa Carbon matag gabii.

“Magdala rakog two ka tables nga butangan sa biscuits ug folding bed nga among katolgan,puli-puli lang mi’g tog, ”niya pa.

Nihangyo siya sa iyang gitrabahoan nga clinic nga buntag na siya mo-duty kay maninda siya sa Carbon matag gabii. Apan gamay ra gihapon siya og halin didto.

“Halinan raka’g P1,000, unya mauwanan pa ka, magpasilong na lang mi’s multicab kon uwan,” niya pa.

Giantos gyud niya kining tanan tungod ug alang sa gugma niya sa iyang mga tawo, kinsa nagsalig og dako sa sweldo nila gikan kaniya.

“I love my people. I have to be strong for them ‘coz they are depending on me. I’m supporting their families,”niya pa.

“I feel like patapon akong life, moingon ang uban nganong gibuhat ko ni nga nurse man ko, I can go abroad. Pero nanay nagsalig nako, dili nako sila pwede pasagdan,”asoy pa niini.

Ang kanunay niyang tinubdan sa kusog mao ang iyang amahan kinsa magsige og tambag kaniya nga dili mosurindir.

Human sa tulo ka buwan nga naninda sa Carbon, niundang siya human natambagan sa iyang uyoan nga usbon niya ang iyang istilo sa pagpamaligya og biscuit. Sayop matod pa iyang target nga mga kustomer, dapat i-target niya ang mga middle class ug kinahanglan palambuon niya ang packaging niini aron mas mahalin.

Gisunod  niya ang tambag sa iyang uyoan ug gitarong niya ang putos niini ug gipapilitan  niya kini og sticker nga adunay pangalan sa iyang tindahan.

Gihagad niya kini sa distributor sa mga tindahan sa North Bus Terminal ug gikaloy-an siya kay nakauyon kini sa iyang produkto ug ni-order una og lima ka karton. Gikan sa lima, nahimo kining 10 ug hangtod nga nagkadaghan na ang orders.

Sukad adto nagkadaghan ang distributor nga mopalit kaniya. “Dako gyud kog pasalamat ni sir Alejandro Dinoy kay siya gyud to ang naghatag nako’g break,”niya pa.

Tungod niini, napadak-an nasab niya iyang bakery. Mitaas sab ang iyang halin. Aduna nasab siya’y delivery van karon.

Giisip niyang sekreto sa kamlamposan sa iyang negosyo mao ang, “hardwork ug don’t give up. Mangunay gyud ka.”

Kanunay matod pa siyang mohangad ngadto sa Ginoo ilabi na nga aduna siya’y problema. Pangandoy niya nga mas modako pa iyang negosyo.

“I want to get rich, so I can help more.”

Sa tanan niyang naagian, tambag niya ngadto sa uban aron molambo mao nga: “Kung gusto ka molambo, work hard gyud and let God do the rest.”