Opisyal ug mga sakop sa urban poor sa Talisay miangal

CEBU, Philippines – Wala madayon ang gipahigayong public hearing sa kagamhanan sa dakbayan sa Talisay kabahin sa ilang ordinansahon sa paglarot sa mga illegal settlers sa siyudad.

Kini human nga mireklamo ang presidente sa urban poor lakip na ang mga kauban niini tungod kay giingong wala sila hatagi og panahon nga matun-an ang nahisgutang ordinansahon.

Si Teofilo Daitol presidente sa urban poor mipasangil nga gidali-dali sa konseho  sa siyudad ang ilang ordinansa nga gihimo diin maapektohan niini ang mga kabus.

Ang maong ordinansahon nga giduso mao ang pag-ban sa illegal settlement, relocation ug reintegration sa informal settlers.

Si Daitol nangangkon nga wala sila pahibaw-a 10 ka adlaw sa dili pa ang hearing apan maayo na lang gani kay nakabantay sila sa gipatawag nga public hearing.

Matud ni Daitol nga naa sa 80 porsiyento nga namuyo sa Talisay ang wala makaangkon sa ilang kaugalingong yuta.

Ang grupo ni Daitol mihangyo sa konseho nga matagaan sila og higayon sa pagbasa ug pagtuon sa maong ordinansahon ug ingon man pasabton sila sa balaod nga ipatuman sa siyudad.

Samtang si Konsehal Doroteo Emit nahibulong tungod kay giingong tulo lang ka konsehal sa siyudad ang mitambong sa maong public hearing.

Ang author sa maong ordinansahon mao si Bise Mayor Bucao kinsa lakip nga wala usab motambong.

Ang tigbalita misuway sa pagkuha og habig kang Bucao apan wala kini didto sa iyang buhatan. (/BDB)(BANAT NEWS)