Lima ka lungsod apektado sa cyberporn
CEBU, Philippines – Dili momenus lima ka lungsod sa lalawigan sa Sugbo ang apektado sa problema sa cyber-pornography ug human trafficking sumala pa ni Vice Governor Agnes Magpale kinsa maoy chairman sa Provincial Women’s Commission (PWC).
Matud pa niya ang lungsod sa Cordova, Sta. Fe, Madridejos, San Fernando ug ang mga dakbayan sa Lapu-Lapu ug Bogo mao ang apektado nga mga lugar base sa ilang nahimong rescue operations.
Wala pay labot niini ang mga lungsod ug dakbayan kon diin adunay gipahigayon nga surveillance ang PWC uban sa partner agencies niini.
Si Magpale nagkanayon nga nagpabilin nga problema gihapon ang cyberpornography sa lalawigan tungod aduna pay padayon nga nag- operate niini.
Si Magpale nagkanayon nga angay pahingusgan sa mga eskuylahan ang edukasyon kalabot sa maong problema hilabina nga adunay mga ginikanan nga maoy mounay pamiktima sa ilang mga anak.
“We go back to values that’s why we are connecting with schools, teachers, because in one town, murag it has become a habit like the students will be absent from their classes unya moingon sila naa koy show, mura na’g natural na lang sa ilaha,” matud ni Magpale.
Matod sa bise gobernador nga angay kining iapil sa hisgotanan sa meetings sa Parents Teachers Association (PTA).
Gikatakdang pakigkitaan ni Magpale ang mga mayor ug bise mayor sa mga lungsod ug dakbayan nga adunay mga na-rescue karong Hunyo 1.
“This is not to say that their towns have the most number. First and foremost, we have to thank them for their cooperation. Gusto namo sila i-commend for the cooperation that they extended and because we want them to do more,” matud sa bise gobernador. (/IBM)(BANAT NEWS)
- Latest
