Nasubliang kagawad gipatay
CEBU, Philippines – Patay ang nasublian pagka barangay kagawad sa Bulacao sa dakbayan sa Talisay human kini gipusil atubangan sa iyang tindahan sa may Barangay Pitalo, San Fernando Cebu niadtong Huwebes sa hapon.
Ang biktima mao si Dennis Ramos, 45, re-elected councilor sa Barangay Bulacao, Talisay City. Samtang ang mga mamumuno nagsakay og motor nga nagsuot og helmet ug jacket.
Matud pa ni Police Officer 2 Edgar Enclonar, alert team sa San Fernando Police Station, base sa initial nga imbestigasyon nag-abli sa iyang sakyanan si Ramos sa dihang kalit kining gipusil sa makadaghan nga higayon gamit ang kalibre .45 nga pistola base sa pito ka basiyo sa bala nga nakuha sa crime scene.
Human niini, daling miikyas ang gunman padung sa amihanan nga direksyon.Gidala sa pribado nga tambalanan si Ramos apan gideklarar kining patay na.
Sa pagkakaron blangko pa ang kapulisan sa motibo sa pagpusil patay sa konsehal diin padayon pa gihimo ang imbestigasyon.
Sa laing bahin, si Senior Superintendent Manuel Javier Abrugena ang bag-ong director sa Cebu Provincial Police Office miingon nga ilaha pang gisubay kon may kalambigitan sa nakalabay nga piniliay ang motibo sa maong krimen.
Gimando usab ni Police Regional Office-7 director Robert Quenery sa tanang mga hepe sa kapolisan nga maghimo og mga lakang aron mahunong kining mga pagpatay nunot niining sagunson nga mga insidente sa pagpamusil nga nakapabalaka na sa publiko.
“I directed all my unit commanders down to the station commanders to ensure that this (killing) will be stopped,”matud pa ni Quenery. (Shaira Gwen T. Laluna/IBM)(BANAT NEWS)
- Latest
