Motor napasok sa trak, usa patay

CEBU, Philippines — Patay ang backrider sa motorsiklo ug grabe usab nga naangol ang drayber dihang nabangga sila ngadto sa usa ka prime mover diha sa Mantawi Drive ug eskina Ouano Avenue sa Barangay Subangdaku, Dakbayan sa Mandaue alas 7 pasado ang takna sa miaging gabii.

Si Senior Police Officer 1 Melvin Leones nga maoy traffic field investigator sa Traffic Division sa Mandaue City Police Office (MCPO) miila sa  namatay nga mao si  Stephane Bugtai,  29, taga Barangay Pitogo sa Lungsod sa Consolacion.

Nag-angkas kini sa motorsiklo nga gimaneho sa iyang kauban sa trabaho nga si Joel  Dellute, 40, kinsa grabeng naangol.

Si Leones miingon nga gikan sa Parkmall ang mga biktima ug padulong na kining mopauli dihang nakasugat nila ang prime mover nga gimaneho ni Willy Pitogo Cospe, 38.

Tungod sa kakusog sa pagbangga napasok sa ilawom sa prime mover  ang duha.

Ang duha gidala sa  Vicente Sotto Memorial Medical Center sa Dakbayan sa Sugbo apan si Bugtai nga nagrabehan gideklarar nga dead on arrival.

Si Pitogo gitanggong karon sa karsel samtang giandam na ang kaso batok niini. (IBM) (BANAT NEWS)