Tulo ka mga barangay sa lungsod sa Daanbantayan drug cleared

CEBU, Philippines — Tulo ka barangay sa lungsod sa Daanbantayan ang nadugang sa listahan sa ilang Barangay Anti-Drug Abuse Council (BADAC) nga drug cleared.

Ang maong mga barangay gilangkuban sa Bitoon, Lanao ug Malingin diin gi-confirm kini sa ilang Municipal Anti-Drug Abuse Council (MADAC) niadtong Abril 6, 2018 atol sa ilang tigom diha sa Lanao Barangay Hall.

Ang MADAC mao’y mirekomendar sa nahisgutang mga barangay ngadto kang Mayor Vicente Loot ug sa hepe sa kapolisan sa lungsod Police Senior Inspector Irish Dilem.

Kahinumduman nga ang Barangay Carnaza, Calape, Dalingding, Logon, Tinubdan, ug Tominjao nga gideklara nga mga drug cleared barangay niadtong Hulyo 6, 2017.

Ang maong kalamboan tungod sa pagtinabangay sa mga residente sa lugar, kagamhanan sa lungsod, kapolisan, MADAC ug BADAC sa pakigbatok sa ginadiling drugas.

Ang maong mga drug cleared barangay i-certify kini ni Dilem o ikompirma ni Loot kinsa maoy chairman sa MADAC ug iduso nila kini ngadto sa oversight committee alang sa validation aron maisyuhan og certification.

Ang hepe sa Philippine Drug Enforcement Agency (PDEA) maoy chairman sa oversight committee. - Rejena M. Sevilla, PIT Interns (BANAT NEWS)