Hugpong nga modumala sa trapiko giduso sa PB

CEBU, Philippines — Gitugyan ngadto sa committee on public safety, peace and order sa Provincial Board ang ordinansahon ni Bokal Edsel Galeos sa pag-umol og Inter-Agency Council for Traffic Operation and Management sa Probinsiya sa Sugbo.

Ang maong council mao ang mo-coordinate sa nagkadaiyang ahensiya nga gimanduan sa balaud sa pagdumala sa trapiko.

Sa probisyon sa giduso nga balaudnon, ang maong council mo-review sa pagplano, operasyon, enforcement, ug management sa mga polisiya ug regulasyon sa trapiko sa mga lungsod ug dakbayan sa Lalawigan sa Sugbo.

Si Galeos nga maoy nangamahan sa maong ordinansahon nagkanayon gikinahanglan na gyud ang maong council tungod sa problema sa trapiko karon sa Sugbo.

“We need it very very badly, asap (as soon as possible) na tungod sa sitwasyon nga kinahanglan gyud ta og well-coordinated kaayo nga ma-monitor ug ma-implement ang mga balaud nga dugay na nga gi-mandate sa inter-agency.

Nakita sa bokal nga tungod sa nagkadaghan nga sakyanan sa Sugbo ug nagkadaghan nga mga tawo apan nagpabilin nga gagmay ang mga dalan maong kinahanglan nga adunay mo-monitor niini nga council nga langkuban sa mga ahensya nga gitahasan sa balaud sa pagdumala sa trapiko. (BANAT NEWS)