Drug-free Region 7 tungason pa

CEBU, Philippines — Lisud pa sa Central Visayas nga mahimong drug-free bisan usa sa mga probinsiya niini sigun pa sa Philippine Drug Enforcement Agency-7.

Niadtong Abril 18, gideklarar na sa PDEA-8 ang Southern Leyte nga usa ka drug-free nga probinsiya.

Mismo ang director-general sa PDEA nga si Aaron Aquino ang niingon nga ang Southern Leyte mao ang ikatulong probinsiya sa nasud nga gideklarar nga drug-free.

Ang tigpamaba sa PDEA-7, Leia Albiar, niangkon nga taas nga panahon pa ang gikinahanglan aron adunay madeklarar nga drug-free nga probinsiya sa Rehiyon 7.

“Usa sa challenge nato diri sa Region 7 kay daghan ta og barangays then daghan pud ang drug-affected. Ang ubang region kay gamay ra man ang drug-affected barangays nila. Maski usa lang ka user ang naa sa barangay kay considered as drug affected naman siya,” matud ni Albiar.

Sa tuig 2017, niabot na og 190 ka barangay ang ilang nadeklarar nga drug-free diin ang 160 niini gikan sa Probinsiya sa Sugbo samtang ang 30 gikan sa Negros Oriental.

Lakip sa 160 ang tanang 29 ka barangay sa Dakbayan sa Bogo, sa Probinsiya sa Sugbo.

Taliwa niini, malaumon ang maong ahensya nga mapun-an pa kini karong tuiga.

“It’s a process, and dili siya pwede dali-dalion kay daghan factors gi-consider, especially ang institutionalization of community-based rehab programs sa mga barangays,” si Albiar niingon.

Kauban sa ubang mga sakop sa oversight committee, kasamtangan pang gipahigayon ang mga onsite validation sa mga barangay sa rehiyon aron masuta kon angayan na ba kining ideklarar nga gawasnon sa drugas.

Giingong gi-monitor sab gihapon sa maong committee ang mga lugar nga una nang gideklarar nga drug-free sanglit mamahimo gihapong mabakwi ang titulo niini.

Niadtong tuig 2017, ubos sa Dangerous Drugs Board Regulation No. 3 Series of 2017, giduso ang pagtukod og oversight committee nga maoy modeklarar nga drug-cleared o drug-free na ang usa ka lugar.

Gilangkuban kini sa PDEA diin ang regional director niini ang mamahimong chairperson, Department of the Interior and Local Government (DILG) diin ang regional director isip vice chairperson, samtang ang mga sakop mao ang Philippine National Police (PNP), Department of Health (DOH) ug Local Government Unit (LGU). (BANAT NEWS)