PB magpatabang sa Malacañang pagplano sa isla sa Bantayan
CEBU, Philippines — Nangayo og tabang ang Provincial Board sa Sugbo sa buhatan ni Cabinet Secretary Leoncio Evasco Jr. pinaagi sa Performance and Projects Management Office nga motabang sa paghan-ay sa Comprehensive o Integrated Development Master Plan sa Isla sa Bantayan.
Ang PB nipasar og resolusyon nga gipaduso ni Bokal Horacio Franco nga naghangyo kang Evasco pinaagi sa PPMO Executive Director, Undersecretary Gloria Jumamil, sa pagpadala og team sa Sugbo aron magpahigayon og usa ka makuti nga pagtuon ug pagtuki sa Isla sa Bantayan.
Ang isla giila sa kanindot sa baybayon sa Lungsod sa Santa Fe, kaabunda sa marine products sa Madridejos ug ang “egg basket” sa Bantayan.
Matud ni Franco nga nagkinahanglan og husto nga pagplano ug pagtuon ang isla aron maseguro nga ang kwarta nga gamiton sa pagpalambo dili mausik ilabi na sa eco-tourism sa isla.
Ang Executive Order No. 99 nga gipirmahan ni kanhi Presidente Benigno Aquino III kaniadtong Oktubre 31, 2012 nagmugna sa PPMO ug sa mga gimbuhaton niini sama sa pagpakig-alayon sa tanang hingtungdang ahensiya alang sa hapsay nga pagdumala ug tukma nga pagpatuman sa mga programa ubos sa Performance and Projects Roadmap sa gobiyerno. - Mary Rose S. Sagarino, CNU Intern (BANAT NEWS)
- Latest