12 ka tawo nadakpan sa drug bust

CEBU, Philippines — Dose ka mga tawo ang nasikop sa mananglahing mga buy-bust operations sa kapolisan dinhi sa Sugbo.

Ang siyam niini nadakpan sa Barangay Mactan ug Buaya alas 10 pasado ang takna sa miaging gabii.

Si Police Chief Inspector Wayne Magbanua, hepe sa Presinto 2  sa Lapu-Lapu City Police Office (LLCPO) miila sa ilang nadakpan nga mao sila si Maribel Abala, 46, Neregen  Canoy Rombo, 40, Nicanor  Gomez  Quisel, 42, Nelson Omandam  Santiata, 20, Lemuine  Peras Manguilimotan, 20,  Napthali Estardo Igot, 53, ug Richard  Carlum Mangas, 26 .

Nasakmit sa kapolisan sa operasyon ang usa ka medium size nga shabu, walo ka gagmay nga pakete, P500 nga buy-bust money ug mga drug paraphernalia.

Matud pa ni Chief Inspector Magbanua nga si Abala ra unta ang ilang target apan naaktohan hinuon ang unom diha sa drug den.

Samtang ang team nga gipangulohan usab sa hepe sa Presinto 5 sa LLCPO nga si Chief Inspector Jaime Tolentino, nadakpan sa buy-bust operation sa Zone 6, Saac,  Barangay Buaya si Federico Ferolino Pateño alyas Saldi, 50, ug Eric Buenaflor Arquillano alyas Papart, 48.

Nakuha sa kapolisan kanila ang 31 ka gagmay ug duha ka medium size packs, usa ka dako nga putos nga pulos may sud nga gituohang shabu.

Sa laing operasyon, duha ka gidudahang drug pushers ang nadakpan sa buy-bust operation sa Sitio San Roque, Barangay Sambag Uno niadtong Sabado sa kaadlawon.

Samtang sa Barangay Danglag, lungsod sa Consolacion, nakuhaan og drogas ang usa sa duha ka mga suspetsado sa pagpangawat og bisekleta niadtong Sabado sa gabii.

Ang nasikop sa buy-bust operation giila sa Police Station 2 mao silang Danilo Vergara, 54, usa ka dispatser didto sa Cebu South Bus Terminal ug si Waldo Apuhin, 55. Nakuha gikan kang Vergara ang upat ka gagmay ug upat ka medium nga pakete sa gidudahang shabu diin naglakip na niini ang target nga paliton sa maong buy-bust. Samtang matod pa ni SPO1 Domino Decoriña, mga drug paraphernalia lang ang nakuha gikan kang Apuhin.

Didto sa Consolacion, nakuhaan og usa ka medium nga pakete sa gituohang shabu ug usa ka kalibre .38 nga armas ang usa sa duha ka mga suspek sa pagpangawat og usa ka mountain bike.

Ang nakuhaan og armas mao si Francisco Libradilla, 26, taga Guiwanon, lungsod sa Barili ug kasamtangang nagpuyo sa maong barangay. Samtang ang iyang kauban nga nadakpan sab mao si Archie Ericido ,30.

Sumala pa ni SPO2 Vicente Guila nga gikawat sa duha ang mountain bike ni Jail Officer Raymund Ceballos, 28, diha sa Danglag apan nasakpan silang duha sa igsuon sa jailguard. -  Camille Pateres ug Mary Rose S. Sagarino/CNU Intern (BANAT NEWS)