Kontrobersiyal nga heavy equipment gisubhan na

CEBU, Philippines – Gisubhan na ang P227 milyones nga heavy equipment nga napalit sa Kapitolyo ubos sa adminitsrasyon ni Gobernador Hilario Davide III.

Niabot kini og 27 ka gagmay ug dagkong ekipo alang sa pag-ayo sa dalan sa probinsya.

Matud ni Davide kini ang labing daghang ekipo nga napalit sa probinsiya sulod sa upat na ka administrasyon.

Gipahigayon ang blessing sa maong mga ekipo kagahapon sa Provincial Motorpool sa kanhi DA Compound sa Dakbayan sa Sugbo.

Matud ni Davide nga dako ang matabang niini sa pag-ayo sa mga dalan sa probinsiya.

Matud ni Davide nga moumol ang Kapitolyo og lima ka task groups nga langkuban sa mga operators nga maoy modumala sa mga heavy equipment.  Ang maong mga ekipo ibutang kini dugang sa mga karaan nga ekipo sa probinsya ngadto sa mga distrito ug lungsod.

Adunay set nga ibutang sa south, north, mid-south, mid-north ug sa mga Isla sa Bantayan ug Camotes.

Matud ni Davide nga adunay 47 ka karaan nga ekipo ang Kapitolyo diin 31 niini ang magamit pa ug 16 ang dili na.

Ang gobernador niawhag sa mga mayor nga kun mo-request paggamit sa maong mga ekipo kinahanglan lang nga mosunod sa guidelines.

Sama pananglitan kung ang lungsod mogamit alang sa ilang dalan, ang LGU maoy mopalit og krudo sa maong ekipo.

Dili usab magdugay ang maong ekipo sa lungsod tungod magamit pa kini sa ubang lugar.

Ang pagpalit sa maong heavy equipment nalangay human niagi sa daghang kontrobersiya sama sa giingong overpricing nga niresulta sa failure of bidding.

Ang gibayad sa pagpalit sa maong mga ekipo giutang sa Kapitolyo gikan sa Land Bank of the Philippines nga moabot sa P200 milyones diin sulod sa lima ka tuig bayaran sa Probinsiya sa Sugbo. (/GMR)(BANAT NEWS)