Edad dili makapausab ni Pacquiao

CEBU, Philippines – Gipapas ni Manny Pacquiao ang mga pagduda ngadto kaniya nga dili na siya ang susama nga kahadlokan ug kusgan nga boksidor nga midominar kaniadto ibabaw sa ring.

Atubangan sa liboan ka  boxing fans didto sa Kuala Lumpur, Malaysia, ang Pinoy boxing icon  misaad nga usa ka paspas ug bangis nga Pacquiao ang mopakita aron mailog ang WBA welterweight title ni Argentinian Lucas Matthysse sa Hulyo 15.

Sila si Pacquiao ug Matthysse nag-abot sa ikaduhang higayon atol sa   Malaysian  leg  sa ilang promotional tour kagahapon diin mipasalig si Pacquiao sa iyang mga fans nga layo pa siya sa pagkalaos bisan pa sa edad nga 39-anyos.

Si Pacquiao nagkanayon nga human sa sangka ni Matthysse, aduna pa siya’y duha ka   sangka ug usa niini ang seguradong anhi sa Pilipinas ipahigayon.

“It’s not about a number, it’s not about age, that doesn’t matter,” matud pa ni Pacquiao sa Associated Press. “It depends how you discipline yourself in training, how you prepare. Definitely this is not my last fight," he said. I think I still have got a couple of more fights until I retire.”

Ang pamahayag ni Pacquiao magsilbe usab nga tubag sa gipalanog ni Matthysse nga dili na  kahadlokan tungod sa pangedaron niini.

Gibasihan ni Matthysse mao ang kapildihan ni Pacquiao  ngadto ni Australian Jeff Horn sa miaging tuig ug wala na usab kini makahimo og ‘knockout’ nga kadaogan sud na sa siyam ka tuig.