Patay'ng lawas ni Mons. Pono gilubong na sa Pinamungajan

CEBU, Philippines — Hingpit na nga gihatud sa kapahulayang dayon ang kura paruko sa St. Catherine de Alexandria Parish, Mons. Carlito Pono, sa iyang yutang natawhan sa Lungsod sa Pinamungajan kagahapon sa hapon.

Usa ka Santos nga Misa ang gipahigayon nga gipangulohan ni Archbishop Jose Palma uban sa daghang kaparian sa Archdiocese of Cebu.

Gatusan ka tawo ang nitambong sa Santos nga Misa hangtud sa paghatud na sa lubnganan sa sam-ang sa maong lungsod.

Nihatag sa iyang wali ang suod ni Pono nga si Msgr. Achilles Dakay, ang kanhi tigpamaba sa Archdiocese of Cebu.

Gipaambit ni Dakay ang iyang mga kasinatian sa pag-uban nila ni Pono.

Matud ni Dakay nga dili nila malimtan ug sa tanang nakaila ni Pono nga dili gyud palakwon sa namatay nga obispo ang mga tawo hangtud dili makakaon ug mabusog.

Awhag ni Dakay sa tanang nitambong sa Santos nga Misa sa pagpangandam kanunay aron kung moabot na ang takna nga kuhaon na ang kinabuhi sa Labaw nga Makagagahum andam na ang tawo.

Sulod sa Santos nga Misa gibasa usab ang resolusyon sa Sangguniang Bayan sa Pinamungajan nga nagpadangat sa ilang pahasubo ngadto sa pamilya ni Pono.

Samtang ang ig-agaw ug igsuon ni Pono nipadangat usab sa ilang mensahe lakip usab ang pagpasalamat sa tanang tawo nga niduyog sa ilang kasub-anan. (BANAT NEWS)