“Unaha Ang Ginoo”
Junas Dungog Flores (Banat) - April 16, 2018 - 12:00am

CEBU, Philippines — Napuno sa pagsuway ang iyang kinabuhi, ilabi na sa aspeto nga pinansyal. Apan wala gayud siya nagpakawala og paglaum. Naningkamot, inubanan sa hugot nga pagsalig sa Kahitas-an ug nagmalampuson. Siya mao si Alfredo R. Awe, 65 anyos, residente sa Lo-oc, Lapu-Lapu City, ug tag-iya sa Awe Trading ug Providence Janitorial and Messengerial Services.

Lumad nga taga-Arbor, Boljoon, Cebu si Alfredo diin ikaduha siya sa siyam ka managsuon sa tindero og pan nga amahan ug tigtumod og isda nga inahan. Sa syudad sa Sugbo nagtrabaho iyang amahan ug panagsa ra kini makauli sa ilaha ug gamay ra gyud kini og hinatagan ngadto sa iyang inahan.

Aron sigurado nga makakaon sila, magsuroy og isda iyang inahan ug puli-pulihon sila og dala niini sa pagpaninda ngadto sa kabukiran. Sayes anyos pa lang siya, mouban na siya niini pagtangas sa kabukiran diin magdala sila og isda ug ibaylo nila kini og mga lagutmon ug mais gikan sa matag balay nga ilang maagian.

Nagtungha siya sa Baclayan Elementary School sa Grade 1 hangtod 4 diin kanunay siyang madugay og abot sa tunghaan sanglit moatiman pa man siya sa ilang mga hayopan. Naningkamot siya sa pagtungha ug kanunay mag-una sa klase.

“Kung dili ko maningkamot, mag-unsa na lang akong mga manghod?” Butyag pa niya makatuon lamang siya sa higayon nga maglung-ag inig kadlawon diin mopaduol lang siya sa kayo aron mahayagan ang gibasa.

Grade 4 ra kutob ang unang tunghaan niini maong didto na siya nipadayon  sa Boljoon Central School.

Gawas sa lagutmon, kasagaran nilang balon sa paniudto kay mais ug buwad nga gisulod sa dahon sa saging.

“Alas dos sa kadlawon kay pukawon nami ni mama. Among ligsan og bato ang mais aron magaling ug malung-ag,” hinumdom pa niya.

Nigradwar gyud siya sa elementarya nga third honors.

Pinaagi sa panabang sa iyang elementary teacher, gidala siya sa Cebu City ug gipatrabaho sa sari-sari store niini isip stay-in. Duty siya sa buntag ug estudyante sa gabii sa Cebu College of Commerce ( University of Cebu). Ang iyang sweldo sakto ra sab pambayad sa tunghaan. Ug nigradwar gyud siya sa hayskul isip salutatorian. Nipadayon siya sa kolehiyo sa susamang tunghaan sa kursong BS Commerce in Accounting.

Niining panahona nanira ang iyang gitrabahoan nga tindahan kay nalugi kini. Busa, “Giadto nako si Atty. Go ug nihangyo ko nga pwede ba librehon ko sa eskwelahan.”

Gitugutan siya sa tag-iya nga motungha nga libre. Aktibo siya sa bisan unsa nga kalihukan sa tunghaan sa high school pa maong nailhan siya sa presidente.

Ug kay wala naman siya’y kapuy-an, wala na sab siya’y saktong kaon.

“For so many nights memorize gyud akong kaon. I stayed from one friend to another,” aron lang gyud makasugakod.

Night gihapon ang schedule ni Alfredo sa kolehiyo. Bisan sa kalisod sa iyang gidangatan, nahuman gyud niya ang usa ka tuig apan wala na nag-enrol sa 2nd year sanglit naglisod na man gyud siya. Nipauli siya sa ilaha ug nag-uma.

“Among balay sa una kay nipa ang atop,daghan na og buslot ug makita na ang bituon. Ang salog namo nga kawayan kay daghan sab og buslot,” hinumdum pa niya.

Busa paglabay sa tulo ka tuig, nibalik siya sa dakbayan aron manimpad. Nakasuway siya og lain-laing trabaho apan dili ra siya magdugay. Niistar siya sa gamay’ng balay sa iyang uyuan.

Usa ka adlaw niana nagkatagbo sila ni Atty. Go ug nangumusta kini kaniya. Gisuginlan niya kini sa iyang sitwasyon. Naluoy niya ang maong negosyante ug gipabalik pagtungha. Gihimo siyang student assistant sa accounting department ug gipapuyo sab siya sa pinuy-anan sa varsity players.

Gipadayon ni Alfredo ang iyang kurso nga nasugdan. Student leader siya sulod ug gawas sa tunghaan. Ug pinaagi sa iyang determinasyon ug paningkamot, nigradwar gyud siya sa kolehiyo isip cum laude.

Sa wala pa nakapasar sa Certified Public Accountant Board Exam, nakatrabaho na sa nagkadaiyang mga bangko dinhi sa Sugbo, Negros ug Bohol si Alfredo. Nag-parttime sab siya isip instructor sa UC ug niadtong 1982 gikasal siya sa asawang si Esmeralda. Human sa upat ka tuig isip magtutudlo, niundang siya ug nikuha og abogasiya sa University of the Visayas.

Padayon siya nga nagtrabaho sa bangko ug niadtong 1988 gipasidunggan isip Most Outstanding Employee sa PNB.

Niadtong Mayo 31, 2001, niretiro siya sa bangko ug nagtukod og kaugalingon nga negosyo, ang Awe Trading pinaagi sa capital nga P300,000. Nangutang siya og P245,000 sa usa ka korporasyon aron mas mapalambo ang iyang negosyo. Mag-supply sila og mga lutoon nga mga produkto sama sa noodles, catsup, vinegar ug uban pa ngadto sa nagkalain-laing canteen sa mga kompaniya. Traynta porsiyento sa canteen sa Mactan Export Processing Zone ug IT Park sila ang supplier.

Niadtong 2003, gibuksan sa magtiayon ang Providence Janitorial and Messengerial Services. Nanag-iya na sila og tindahan didto sa Boljoon ug bag-o nilang giablihan mao ang Awe Food and Catering.

Niadtong 2004, nidagan siya isip municipal councilor sa Boljoon ug palaran nga nakadaog. Human sa tulo ka termino, niadtong 2013, nidagan siya pagka bise mayor ug nagmadaugon.

Ang iyang kasinatian kaniadto sa bukid maoy nakaaghat kaniya nga muserbisyo. “Since na-elect ko,wala gyud koy gidala nga kwarta dinhi sa among balay gikan sa akong sweldo as pulitiko, tanan ana akong itabang sa mga tawo, mopuno pa gani ko,”asoy pa niya.

Human sa iyang unang termino nagpasubli siya apan wala buligi sa kahigayonan.  Bisan wala na siya’y posisyon, padayon iyang pagtabang ngadto sa mga nanginahanglan.

Ang mang-uuma lang kaniadto, tag-iya na karon og nagkalain-laing negosyo. Giisip niyang sekreto sa kalamposan niini mao kini: “Hands on gyud ka, dapat on time ka sa delivery, kung mahimo mas mauna pa sa giingon nga oras.”

“Dapat taas ka’g pasensya sa imong clients ug isalig sa Ginoo ang tanan,”dugang pa niya.

Gibutyag ni Alfredo nga ang iyang kalamposan karon, nagsugod lang sa usa ka pangandoy.

“Ambition gyud,maningkamot gyud ko nga makab-ot nako. I have to sacrifice,” niya pa.

Ang tulo niyang mga anak gradwado na sa kolehiyo. Matod pa, nakab-ot ni niya ang tanan tungod sa pagsalig ngadto sa Ginoo. Miyembro ang magtiayon sa nagkalain-laing religious community aron mapalambo ang spiritual nga aspeto sa kinabuhi.

“Unaha ang Ginoo, ampo pirme. Set an ambition and work for it,” panapos niya.

 

ALFREDO AWE
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with